کراچی: سندھ کے سیکریٹری تعلیم نے صوبے کے تمام تعلیمی اداروں میں موسم گرما کی تعطیلات کا اعلان کرتے ہوئے کہا ہے کہ یکم جون سے 31 جولائی تک موسم گرما کی تعطیلات ہوں گی۔
صوبائی سیکریٹری تعلیم کا کہنا ہے کہ تعلیمی اداروں میں تعطیلات اسٹیرنگ کمیٹی کے فیصلے کے مطابق دی جارہی ہیں، صوبے میں تعلیمی ادارے یکم اگست کو کھلیں گے۔
یاد رہے کہ ان دنوں کراچی سمیت سندھ بھر میں شدید گرمی کی لہر جاری ہے، محکمہ موسمیات کے مطابق آئندہ تین روز کے دوران کراچی میں موسم نسبتاً گرم اور مرطوب رہنے کا امکان ہے۔
آئندہ تین روز کے دوران زیادہ سے زیادہ درجہ حرارت 34 سے 36 ڈگری سینٹی گریڈ تک پہنچ سکتا ہے جب کہ مغرب اور جنوب مغرب سے ہوائیں چل سکتی ہیں، اس دوران کراچی میں موسم نسبتا گرم اور مرطوب رہنے کا امکان ہے۔
آج جامشورو، مٹیاری، ٹندو الہ یار، میرپور خاص اور سانگھڑ میں کہیں کہیں گرد آلود ہواؤں اورگرج چمک کے ساتھ ہلکی بارش ہوسکتی ہے۔
محکمہ موسمیات کا بتانا ہے کہ جامشورو، دادو، قمبر شہداد کوٹ، شہید بے نظیر آباد، سکھر ،گھوٹکی، لاڑکانہ ،جیکب آباد اور دیگر اضلاع میں درجہ حرارت 45 ڈگری سینٹی گریڈ یا اس سے زیادہ رہنے کا امکان ہے۔