اسی طرح بھاگتے رہے تو ہم اگلی دفعہ ۔۔ فواد چوہدری کی اہلیہ کا شوہر کے بھاگنے کی ویڈیو پر دلچسپ تبصرہ

پاکستان تحریک انصاف کے مرکزی رہنماء فواد چوہدری کی اہلیہ نے شوہر کی گزشتہ روز گرفتاری کے خوف سے بھاگنے کی ویڈیو پر دلچسپ تبصرہ کرکے صحافیوں اور حاضرین کو ہنسنے پر مجبور کردیا۔

گزشتہ روز اسلام آباد ہائیکورٹ نے تھری ایم پی او کے تحت فواد چوہدری کی گرفتاری کالعدم قرار دے کر انہیں رہا کرنے کا حکم دیاتھا اور فواد چوہدری رہائی کے بعد جیسے ہی گھر واپسی کے لیے گاڑی میں بیٹھے تو سامنے پولیس اہلکاروں کو دیکھ کر گاڑی سے اتر کر بھاگ نکلے۔

گزشتہ روز شام کے وقت فواد چوہدری نے اپنی اہلیہ کے ہمراہ میڈیا سے بات چیت کی اس موقع پرایک صحافی نے فواد چوہدری سے کہا کہ اگر آپ 10 دن ایسی دوڑیں لگائیں گے تو ماشاء اللہ فٹ ہوجائیں گے اور ساتھ کھڑی اہلیہ نے کہا کہ ہم اگلی دفعہ میراتھون میں جائیں گے۔

میڈیا سے گفتگو کرتے ہوئے فواد چوہدری کا کہنا تھا کہ بطور ترجمان پی ٹی آئی سمجھتا ہوں 9 مئی کے واقعات انتہائی قابل شرم تھے، پاک فوج ہے تو پاکستان ہے اور اسی نکتہ نظرکوسامنے رکھ کرہمیں اپنی پالیسیاں بنانی چاہیے۔

فواد چوہدری کا کہنا تھاکہ میرا تعلق جہلم سے ہے اور یہ ضلع شہیدوں اور غازیوں کا مسکن ہے، ہمارے خاندانوں اور لہو کے رشتے سے زیادہ یہ مقدم ہے۔9 مئی کو کور کمانڈر کے گھر اور جی ایچ کیو پر جو واقعہ پیش آیااس پر ہر پاکستانی رنجیدہ ہیں اور اس کا دل خون کے آنسو رو رہا ہے۔