پاکستان کرکٹ بورڈ نے بھارت کے ساتھ کئی سالوں سے معطل ٹیسٹ سیریز کھیلنے کیلئے گرین سگنل کے ساتھ مقام کا بھی اشارہ دیدیا۔
پاکستان اور بھارت کے درمیان آخری بار باہمی سیریز 2013 میں کھیلی گئی تھی جبکہ دونوں ٹیموں کے درمیان آخری بار ٹیسٹ میچ دسمبر 2007 میں کھیلا گیا تھا۔
چیئرمین پی سی بی کی مینجمنٹ کمیٹی نجم سیٹھی کاکہنا ہے کہ پاک بھارت ٹیسٹ سیریز آسٹریلیا، انگلینڈ اور جنوبی افریقا میں ہوسکتی ہے اور اس کے لیے پہلا آپشن انگلینڈ جبکہ دوسرا آسٹریلیا ہوگا۔
آسٹریلیا میں ہاؤس فل ہو سکتا ہے تو ٹھیک ہے، یہ بڑا اچھا ہوگا، بھارت کے ساتھ ٹیسٹ سیریز کے لیے دبئی ہمارے لیے سستا پڑے گا۔
پاکستان اور بھارت کی ٹیسٹ سیریز کا آئیڈیا گزشتہ سال بھی خبروں کی زینت بنا تھا اور دونوں ملکوں کے درمیان سیاسی تناؤ کی وجہ سے دوطرفہ سیریز نہیں ہو رہی۔
یاد رہے کہ پاکستان اور بھارت کے درمیان باہمی سیریز کا سلسلہ کئی برسوں سے بند ہے اور عالمی ایونٹس کے علاوہ دونوں ٹیمیں کسی باہمی سیریز میں مدمقابل نہیں آئیں۔
رواں برس ایشیا کپ کے پاکستان میں انعقاد کے حوالے سے بھی ان دنوں تنازعات جاری ہیں کیونکہ بھارت پاکستان آنے سے انکاری ہے اور جواب میں پاکستان بھی ورلڈکپ کیلئے بھارت نہ جانے کا عندیہ دے چکا ہے۔