پاکستان تحریک انصاف کے چیئرمین و سابق وزیراعظم عمران خان کی نیب کیس میں گرفتاری کے حوالے سے سپریم کورٹ میں درخواست کی سماعت شروع ہوگئی۔
چیف جسٹس عمر عطاء بندیال ، جسٹس محمد علی مظہر اور جسٹس اطہر من اللہ پر مشتمل 3 رکنی بینچ درخواست کی سماعت کررہا ہے۔
سماعت کے دوران عمران خان کے وکیل حامد خان کا کہنا تھا کہ عمران خان ضمانت قبل از گرفتاری کے لیےاسلام آباد ہائی کورٹ آئے تھے جہاں رینجرز نے عمران خان کے ساتھ بدسلوکی کی اور عمران خان کو گرفتار کر لیا۔
سماعت کے دوران جسٹس اطہر من اللہ نے کہا کہ کیا مناسب نہ ہوتا کہ نیب ہائی کورٹ کے رجسٹرار سے اجازت لیتا، نیب نے قانون اپنے ہاتھ میں کیوں لیا؟ سیاسی حالات کی وجہ سے ملک میں جو کچھ ہو رہا ہے بہت افسوس ناک ہے۔
دوسری جانب تحریک انصاف کی جانب سے سپریم کورٹ میں عمران خان کی گرفتاری کے خلاف ایک اور درخواست دائر کردی گئی ہے، درخواست میں عمران خان کی رہائی اور گرفتاری کی تحقیقات کا حکم دینے کی استدعا کی گئی ہے۔درخواست میں وفاقی حکومت، وزارتِ دفاع اور نیب کو فریق بنایا گیا ہے۔