فواد چوہدری کو سپریم کورٹ کے باہر سے گرفتار کرلیا گیا

پاکستان تحریک انصاف کے سینئر رہنما فواد چوہدری کو سپریم کورٹ کے باہر سے گرفتار کرلیا گیا۔

پی ٹی آئی کے مرکزی رہنما صبح 11 بجے سے سپریم کورٹ میں موجود تھے، وہ گرفتاری کے ڈر سے عدالت عظمیٰ سے باہر نہیں آرہے تھے۔ لیکن اسلام آباد پولیس نے فواد چوہدری کو تھری ایم پی او کے تحت گرفتار کرکے تھانہ سیکرٹریٹ منتقل کردیا ہے۔

تفصیلات کے مطابق فواد چوہدری گرفتاری سے بچنے کے لیے تقریباً 12 گھنٹے سپریم کورٹ کی عمارت میں موجود رہے، ان کو نقص امن کی دفعات کے تحت 30 دن تک زیر حراست رکھا جا سکتا ہے۔

رات کو فواد چوہدری عمارت سے باہر آئے انہوں نے کہا کہ وکلاء کو اتنا تقسیم کیا گیا کہ ان کی طاقت بھی ختم ہوگئی، کبھی پٹیشنر کی اس طرح گرفتاری نہیں ہوئی ہے، کل ہائیکورٹ میں میری ضمانت منظور ہوئی۔عمران خان کی گرفتاری بھی عدالت کی حدود سے کی گئی، آج تمام تر توجہ سیاسی مخالفین کو دبانے پر ہے۔ بہتری اسی میں ہو گی ہم ایک دوسرے کو جگہ دیں اور آگے چلیں۔