کراچی: پولیس نے جلاؤ گھیراؤ کرنے والے پی ٹی آئی کارکنوں کیخلاف کریک ڈاؤن شروع کردیا، شہر قائد سے سیکڑوں ملزمان کو حراست میں لے لیا گیا۔
زیر حراست افراد کو سی سی ٹی وی فوٹیج کی مدد سے شناخت کیا جا رہا ہے،انسداد دہشت گردی کی دفعات کے تحت درج مقدمات میں پی ٹی آئی کے لیڈر بھی شامل ہیں۔
میڈیا ذرائع کے مطابق پولیس نے کراچی میں بدامنی اور جلاؤ گھیراؤ کرنے والوں کے خلاف کریک ڈاؤن کرتے ہوئے 250 کے قریب افراد کو گرفتار کر لیا ہے۔
بس جلانے والے دو ملزمان بھی پولیس کی گرفت میں آگئے ہیں۔ گرفتار ملزمان کے خلاف انسداد دہشت گردی کی دفعات کے تحت مقدمات درج کیے گئے ہیں۔
کراچی میں گزشتہ روز تحریک انصاف کے کارکنوں نے انصاف ہاؤس پر احتجاج کیا اور شارع فیصل کو ٹریفک کیلئے بند کردیاتھا۔
احتجاج کے دوران مشتعل مظاہرین نے پولیس پر پتھراؤ کیا جس پر پولیس نے آنسو گیس کی شیلنگ کی، مظاہرین نے پولیس وین، ٹرک، بس اور چوکیاں جلادی تھیں اور دیگر املاک کو نقصان پہنچایا۔
پی ٹی آئی نے کراچی میں آج پہیہ جام ہڑتال کا اعلان کیا تھا تاہم سیکڑوں کی تعداد میں کارکنوں کی گرفتاری کے بعد شہر میں صورتحال مکمل طور پر انتظامیہ کے کنٹرول میں ہے۔