قومی احتساب بیورو نے چیئرمین تحریک انصاف عمران خان کی گرفتاری کے بعد وزیراعظم شہباز شریف اور حمزہ شہباز سمیت دیگرکو منی لانڈرنگ ریفرنس میں بے گناہ قرار دے دیا۔
نیب نے شہباز شریف خاندان سمیت دیگر کے خلاف منی لانڈرنگ کا ریفرنس دائر کر رکھا ہے۔ احتساب عدالت لاہورکے جج قمر الزمان نے شہباز شریف اور حمزہ شہباز سمیت دیگرکے خلاف منی لانڈرنگ کیس کی سماعت کی۔شہباز شریف کے نمائندے انوار حسین نے عدالت میں پیش ہوکر حاضری مکمل کروائی۔
نیب نے منی لانڈرنگ ریفرنس کی ضمنی رپورٹ احتساب عدالت لاہور میں جمع کرادی ہے، رپورٹ میں شہباز شریف اور حمزہ شہباز سمیت دیگرکو منی لانڈرنگ ریفرنس میں بےگناہ قرار دیا گیا ہے۔ احتساب عدالت نے کیس کی مزید سماعت 24مئی تک ملتوی کردی۔
نیب کے فیصلے پر پی ٹی آئی کا کہنا ہے کہ ملک میں من پسند احتساب کیا جارہا ہے، شہبازشریف اور ان کے خاندان کی رہائی اور عمران خان کی گرفتاری سیاسی مداخلت ہے۔
پی ٹی آئی کا کہنا ہے کہ پی ڈی ایم نیب کو اپنے مفادات کیلئے استعمال کررہی ہے ، نیب کے اقدامات حکمرانوں کو خوش کرنے کی کوشش ہے۔