لاہور: چیئرمین عمران خان کے بعد تحریک انصاف کے رہنماء و سابق گورنر پنجاب عمر سرفراز چیمہ کو بھی گرفتار کرلیا گیا۔
اینٹی کرپشن کی ٹیم نے آج صبح ساڑھے 4 بجے عمر سرفراز چیمہ کو ان کےگھر سے حراست میں لیا ہے۔
دوران گرفتاری اینٹی کرپشن حکام نے عمر چیمہ کو کہا کہ آپ شیونگ کٹ ساتھ لے جاسکتے ہیں، اس پر عمر چیمہ کا کہنا تھا کہ شیونگ کٹ تو نہیں لیکن جوتے پہن لیتا ہوں۔
ذرائع کا کہنا ہے کہ کرپشن کیس میں گرفتار عمر سرفراز چیمہ کو شائد لمبے عرصے تک قید رکھنے کا پروگرام بنایا گیا ہے، اس لئے انہیں اپنا ذاتی سامان ساتھ لینے کو کہا گیا۔
دوسری جانب گزشتہ روز عمران خان کی گرفتاری کیخلاف احتجاج کے بعد مختلف شہروں میں معمولات زندگی جزوی طور پر بحال ہوچکے ہیں تاہم پی ٹی آئی کی جانب سے آج کراچی سمیت دیگر شہروں میں دوبارہ احتجاج کی کال دی گئی ہے۔
منگل کے روز پی ٹی آئی کے کارکنوں نے عمران خان کی گرفتاری کیخلاف احتجاج کے دوران کراچی میں گاڑیاں اور املاک جلادی تھیں جبکہ مختلف شہروں میں حساس علاقوں میں بھی ہنگامہ آرائی کی اطلاعات ہیں۔