Getty Images
کمزور معیشت، شدید مالی بحران، عروج کو پہنچتی مہنگائی اور سیاسی عدم استحکام میں گھرا پاکستان گذشتہ چند ماہ سے آئی ایم ایف سے مالی قرض حاصل کرنے کے لیے مذاکرات کر رہا ہے۔
تاہم آئی ایم ایف کے سٹاف لیول کے معاہدے تک پہنچنے کے لیے ابھی تک کوئی پیش رفت نہیں ہوئی، یہاں تک کہ حکومت نے قرضکے لیے آئی ایم ایف کی متعدد سخت شرائط کو بھی نافذ کیا ہے۔
پاکستان اس وقت زرمبادلہ کے ذخائر میں کمی کے مسائل کا شکار ہے کیونکہ درآمدات اوربرآمدات میں توازن نہ ہونے کی وجہ سے ملکی کرنسی کی قدر میں ڈالر کے مقابلے میں بہت زیادہ گراوٹ آئی ہے اور آئی ایم ایف کی جانب سے 2019 میں طے پانے والے قرض پروگرام کی بحالی نہ ہونے سے بیرونی فنانسنگ مکمل طور پر رک چکی ہے۔
پاکستان قرض پروگرام کے تحت آئی ایم ایف سے 1.2 بلین ڈالر کی ادائیگی کا شدت سے منتظر ہے تاکہ ملک کے کم زرمبادلہ کے ذخائر بڑھیں جو اس وقت 4.2 بلین ڈالر ہیں۔
ایسے میں پاکستان ایکسچینج کمپنیز ایسوسی ایشن کے صدر ملک بوستان نے حکومت کو دو سال کی مدت کے دوران 24 بلین ڈالرز تک کا قرض دینے کی پیشکش کی ہے۔
سینیٹ کی قائمہ کمیٹی برائے خزانہ میں ایکسچینج کمپنیزایسوسی ایشن کے صدر ملک بوستان کا کہنا تھا کہ ’ہم نے چھ ماہ قبل حکومت کو یہ پیشکش کی تھی کہ ملک کے وسیع مفاد میں ہم انھیں 24 سے 25 بلین ڈالرز دو سال کے لیے اکٹھا کر دیتے ہیں۔‘
ان کی جانب سے اس پیشکش نے بہت سے سوالات کو جنم دیا ہے۔
کیا واقعی ان کی یہ پیشکش پرعمل ممکن ہے، اور اگر ایسا ہے تو حکومت پاکستان ایکسچینج کمپنیز ایسوسی ایشن کی پیشکش کے بجائے آئی ایم ایف کی شرائط کیوں مان رہی ہے؟ اور ملک بوستان اس رقم کا بندوبست کیسے کریں گے؟
ملک بوستان کا منصوبہ کیا ہے اور وہ رقم کیسے اکٹھی کریں گے؟Getty Images
ایکسچینج کمپنیز ایسوسی ایشن آف پاکستان کے صدر ملک بوستان نے بی بی سی سے اس بارے میں بات کرت ہوئے کہا کہ پوری دنیا میں اس طرح سے پیسے اکٹھے کیے جاتے ہیں اور اس منصوبے کو سویپ ارینجمنٹ کہتے ہیں۔
اس معاہدے کے تحت سمندر پار پاکستانیوں سے آج کے ریٹ پر ڈالر خریدے جائیں گے اور دو سال بعد انھیں ڈالر کے ریٹ میں فرق ادا کر کے واپس کر دیے جائیں گے۔
ان کے مطابق ’جب پاکستان نے 1998 میں ایٹمی دھماکے کیے تھے اس وقت حالات اس سے بھی برے تھے۔پاکستان پر اقتصادی پابندیاں لگ چکی تھیں۔ ابھی تو پاکستان کو آئی ایم ایف نے انکار نہیں کیا اس وقت تو مالی قرض دینے سے انکار کر دیا تھا۔ ان حالات میں مجھے اس وقت کے وزیر اعظم نواز شریف نے بحیثیت ایکسچینج کمپنی ایسوسی ایشن کے صدر بلایا تھا۔
ملک بوستان کا کہنا ہے کہ ’انھوں نے ہم سے مدد مانگی تو ہم نے دنیا بھر میں موجود سمندر پار پاکستانیوں کو متحرک کیا اور اس وقت دو سال میں دس بلین ڈالر سویپ ارینجمنٹ کے تحت حکومت کو لے کر دیے۔ تب ڈالر کا ریٹ بھی کمہوا۔ اب بھی ہم یہی کرنا چاہتے ہیں۔‘
اس منصوبے پر کیسے عمل ہو گا اور رقم کی واپسی کا ’طریقہ کیا ہو گا اس بارے میں بتاتے ہوئے ان کا کہنا تھا کہ ’ہم اورسیز پاکستانیوں جن کے پاس بینک میں ڈالرز پڑے ہیں انھیں ہم دو طرح کی پیشکش کرتے ہیں کہ وہ ہمیں یہ ڈالر بیچ دیں یا پھر ہمیں دو سال کے لیے ادھار دے دیں۔ دو سال بعد ہم واپس کر دیں گے۔ دو سال بعد ہم انھیں ان کے ڈالر اور اس کی قیمت میں آنے والا فرق بھی ادا کر دیتے ہیں۔ اور یہ معاملات بلا سُود ہوتے ہیں۔‘
’اس کے لیے باقاعدہ حکومت سے معاہدہ کرتے ہیں اور یہ بینک اس کی ضمانت دیتا ہے۔ اور یہ سب رقم بینک کے ذریعے ہی منتقل کی جاتی ہے۔ ہمیں یہ رقوم ایک بینک اکاؤنٹ میں بھیجی جاتی ہیں جس کے بعد متعلقہ بینک یہ رقم سٹیٹ بینک میں منتقل کرتا ہے۔‘‘
ملک بوستان کا کہنا ہے کہ انھوں نے اس بارے میں سینیٹ کی قائمہ کمیٹی برائے خزانہ میں بھی اظہار خیال کیا ہے۔’میں نے تو چھ ماہ پہلے یہ مشورہ اسحاق ڈار کو زبانی اور تحریری دونوں صورتوں میں دیا تھا۔ ہم نے انھیں بتایا کے پاکستان دیوالیہ نہیں ہو گا۔ ہمارے پاس فارن ایکسچینج کی کمی نہیں بس اعتماد کی کمی ہے۔‘
ان کا کہنا تھا کہ سینیٹ کی قائمہ کمیٹی برائے خزانہ نے اس بات سے اتفاق کیا کہ کاروباری لوگ خوفزدہ ہو کر پیسے باہر لے گئے ہیں۔
’ہم نے حکومت سے کہا کہ مارکیٹ میں لوگوں کو فری ہینڈ دیں،میری 53 تجاویز تھیں کہ کس طرح فارن ریزرو کو بڑھایا جا سکتا ہے۔ کمیٹی ارکان نے مجھ سے اتفاق کیا اور کہا کہ ہم یہ بات حکومت تک پہنچائیں گے۔‘‘
ملک بوستان کا کہنا تھا کہ ’میری سمندر بار پاکستانی شہریوں سے بات ہوئی ہے سب پیسے دینے کے لیے تیار ہیں۔ ایک ارب ڈالر ماہانہ دیں گے۔ دو سال میں 24 ارب ڈالرہو جائیں گے۔ ہم چار سو ملین پہلے سے دے رہے ہیں‘
’اگر یہ اتنا آسان ہے تو ہر ایکسچینج کمپنی آئی ایم ایف ہے‘Getty Images
معاشی امور کے ماہر اور ایکسچینج کمپنی ایسوسی ایشن کے جنرل سیکرٹری ظفر پراچہ کے خیال میں ملک بوستان کا پیش کردہ منصوبہ اتنا آسان نہیں ہے۔
ظفر پراچہ کا کہنا ہے کہ ’یہ سب اتنا آسان نہیں۔ ہر آدمی کے اپنے خیالات ہیں۔ میں ان کی بات کو مکمل مسترد نہیں کرتا لیکن یہ اتنا آسان نہیں۔‘
ان کا کہنا تھا کہ ’1.2 بلین کے لیے پوری حکومت ادھر ادھر دھکے کھا رہی ہے۔ اگر یہ اتنا آسان ہے تو ہر ایکسچینج کمپنی بذات خود آئی ایم ایف ہے۔ یہ میرا خیال ہے کہ ممکن نہیں ہے۔‘
ظفر پراچہ سینیٹ کی قائمہ کمیٹی برائے خزانہ کے اجلاس میں شریک تھے۔ انھوں نے اجلاس میں ملک بوستان کی جانب سے کی گئی پیشکش پر بتایا کہ’کچھ تجاویز کے ساتھ ہم زرمبادلہ اور ترسیلات زر کی شرح تو بڑھا سکتے ہیں۔ ابھی سالانہ چھ بلین ڈالرز ترسیلات زر ایکسچینج کمپنیوں کے ذریعے آ رہے ہیں۔ یہ پیسہ عوام سے لے کر عوام کو دیتے ہیں۔‘
ان کا مزید کہنا تھا ’اب ملک میں غیر ملکی زرمبادلہ بڑھانے کے لیے کچھ تجاویز پر عمل ہو سکتا ہے۔ چھ سے 12 بلین بن سکتے ہیں۔ لیکن سویپ کرنا یعنی آج 285 کے ریٹ پر ڈالر لیں اور دو سال بعد کے ریٹ پر واپس کر دیں اور فرق ادا کریں۔ اب یہ فرق حکومت کہاں سے دے گی۔‘
ظفر پراچہ کا کہنا تھا کہ وہ ملک بوستان کی تجاویز میں سے چند سے متفق ہے لیکن زیادہ تر باتیں غلط ہیں۔
’یہ نہ ملک کے فائدے کی بات ہے نہ عوام کے فائدہ کے بات ہے۔ اگر ہم اوورسیز پاکستانی کو ایکسپورٹ انڈسٹریز کا درجہ دیں تو ہم ترسیلات زر بڑھا سکتے ہیں۔ اس سے حوالہ اور سمگلنگ کو روک سکتے ہیں۔‘
ان کا کہنا تھا کہ ’کمیٹی نے ان سے تجاویز سننے کے بعد یہی کہا تھا کہ ہم ان پر غور کریں گے۔‘
’اس پر غور ضروری ہے لیکن آئی ایم ایف کا پروگرام ملکی ساکھ کا معاملہ ہے‘
مسلم لیگ ن کے رہنما اور سابق گورنر سندھ محمد زبیر عمر سے جب اس تجویز پر رائے لی گئی تو ان کا کہنا تھا کہ ابھی یہ نئی تجویز ہے اور اس کو جانچنا ضروری ہے تاہم پاکستان اس وقت ایک مشکل صورت حال میں ہے اور اس وقت ہمکسی دوسرے ذریعے پر جانے کا نہیں سوچ سکتے۔
’اس منصوبے کا آئی ایم ایف سے تعلق نہیں لیکن اگر اس پر عمل ہو گیا تو یہ ہمارا مستقل حل ہو گا۔ تاہم میری نظر میں اس کے امکانات بہت کم ہیں لیکن ہمیں اس پر غور ضرور کرنا چاہیے ۔ اگر 12 ارب ڈالر باہر سے آنا شروع ہو جائیں تو پھر آئی ایم کی سخت شرائط پر مناسب انداز میں بات چیت کی جا سکتی ہے تاہم یہ بہت ابتدائی سٹیج ہے۔‘
محمد زبیر عمر کے مطابق ’ابھی ملک بوستان نے قائمہ کمیٹی میں ایک تجویز دی ہے ان کی رائے کو ضرور سننا چاہیے۔ آئی ایم ایف کا پروگرام تو ہم کو مکمل کرنا ہی ہے۔ ہم پہلے ہی تاخیر کا شکار ہو چکے ہیں۔‘
ان کا کہنا تھا کہ ’ہماری ساکھ کا دارومدار بھی اس پر ہے کہ ہم آئی ایم ایف کے ساتھ کب اور کتنے اچھے طریقے سے واپس جا سکتے ہیں۔‘
محمد زبیر عمر کا کہنا ہے کہ آئی ایم ایف پروگرام کو واپس لانے کے لیے اتنے عرصے سے جاری کوشش کا مطلب صرف یہ نہیں کہ ہمیں یہ رقم مل جائے بلکہ آئی ایم ایف دوست ملکوں سمیت تمام ممالک کے لیے ایک سرٹیفیکیٹ کی حیثیت بھی رکھتا ہے۔
’جو اہداف بھی معیشت کی بہتری کے لیے پاکستان نے آئی ایم ایف کے ساتھ مل کر طے کیے ہیں وہ آئی ایم ایف کا سرٹیفیکیٹ ہے جو ہمارے لیے بہت اہم ہے کیونکہ یہ ’پاکستان کو ایک قابل اعتماد ملک ظاہر کرتا ہے۔‘
Getty Images
ان کے مطابق موجودہ صورت حال میں ہم آئی ایم ایف کو چھوڑ کر کسی اور طرف دیکھنے کے متحمل نہیں ہو سکتے۔ اگر کسی بھی دوسرے طریقے پر جانے کا سوچیںتو وہ چاہے سمندر پار پاکستانی ہوں یا کوئی بھی دوسرا طریقہ اگر قابل عمل ہے تو اس کو ساتھ ساتھ چلایا جا سکتا ہے۔
مسلم لیگ کے رہنما کا کہنا تھا کہ سابق وزیر اعظم عمران خان کے دور میں ان کی سمندر پار پاکستانیوں میں ایک مضبوط لابی تھی جو پڑھے لکھے اور سرمایہ دار تھے۔ انھوں نے بھی اپنے دور میں سمندر پار پاکستانیوں کے کیے سکیم متعارف کروائی تھی مگر ان تعلقات کے باوجود وہ کامیاب نہیں ہو سکے۔
محمد زبیر کا کہنا تھا کہ ’بیرون ملک پاکستانی ہوں یا سرمایہ کار وہ دیکھتے ہیں کہ آپ کے ہاں سیاسی و معاشی استحکام کی صورت حال کیا ہے۔اس وقت سٹیٹ بینک آف پاکستان نے ڈالر کے دباؤ کی وجہ سے بیرون ملک (فارن) کمپنیوں کو ان کا منافع بھیجنے سے بھی تقریباً روکا ہوا ہے۔ اور دوسری جانب ایسے میں سمندر پار پاکستانیوں کو کہا جائے کہ آپ پیسہ بھیجیں۔‘
یہ بھی پڑھیے
معاشی بحران: پاکستان کے لیے آئی ایم ایف امداد کتنی اہم ہے؟
’آئی ایم ایف کا قرض پاکستان کے جوہری ہتھیاروں سے مشروط‘ ہونے سے متعلق قیاس آرائیاں کیسے شروع ہوئیں؟
آئی ایم ایف کیا ہے اور یہ پاکستان جیسے معاشی مشکلات کے شکار ممالک کو قرض کیوں دیتا ہے؟
آئی ایم ایف پاکستان میں پیٹرول، گیس اور بجلی کی قیمتوں میں اضافہ کیوں چاہتا ہے؟
’اس تجویز میں بظاہر قباحت نہیں‘
دوسری جانب قومی اسمبلی کی قائمہ کمیٹی برائے خزانہ کے چیئرمین قیصر شیخ نے بی بی سی کو بتایا کہ سینٹ کی کمیٹی کے بعد اب یہ بریفنگ رواں ہفتے قومی اسمبلی کی کمیٹی میں بھی لی جائے گی جس میں اس تجویز کے قابل عمل ہونے سے متعلق غور کیا جائے گا جہاں وزارت خزانہ، ایف بی ار اور دیگر متعلقہ حکامموجود ہوں گے۔
ان کا کہنا تھا کہ بظاہر اس تجویز میں قباحت نہیں۔
’ترکی نے ایسے ہی ایک ماڈل پر کام کیا تھا جس کے تحت انھوں نے اپنے شہریوں سے کہا کہ وہ ڈالر حکومت کو دیں اور ایکسچینج ریٹ میں فرق کو حکومت واپس ادا کرنے کی پابند ہو گی تو ایکچینج کمپنیوں کی جانب سے دی گئی اس تجویز میں بظاہر قباحت نہیں جس میں ایکچینج کمپنیاں سمندر پار پاکستانیوں سے رقوم ارینج کر کے معاہدے کے تحت حکومت کو دے سکتی ہیں۔‘
Getty Images’یہ پیشکش عملی طور پر ممکن نہیں‘
معاشی ماہر اور ایس ڈی پی آئی کے ایگزیکٹو ڈائریکٹر عابد سلہری بھی ملک بوستان کی حکومت کو کی گئی پیشکشکو قابل عمل نہیں سمجھتے۔
بی بی سی سے بات کرتے ہوئے ان کا کہنا تھا کہ یہ منصوبہ کتابی طور پر تو ممکن ہو سکتا ہے لیکن عملی طور پر ایسا ممکن نہیں ہے۔
عابد سلہری کا کہنا تھا کہ ’ملک بوستان کہتے ہیں کہ اس منصوبے کے تحت 15 ہزار ڈالر سے کم رقم بھیجنے والی کی شناخت کا نہ یوچھا جائے، ایسا کرنا پاکستان کے لیے ممکن نہیں کیونکہ ابھی حال ہی میں ملک بڑی مشکل سے فیٹف کی گرے لسٹ سے نکلا ہے۔ اور حکومت ایسا کوئی اقدام اٹھانا نہیں چاہے گی جو دوبارہ اسے اس لسٹ کی جانب لے جائے۔‘
ان کا کہنا تھا کہ ’دوسرا اہم پہلو ڈالر کے ریٹ کا ہے، جو رقم باہر سے آئے گی اس کے ڈالر ریٹ کا تعین کیسے کیا جائے گا۔ اور تیسرا اہم پہلو رقم دینے والوں کو کتنی جلدی اور کس ریٹ پر وہ رقم واپس مل گی۔‘
عابد سلہری کا کہنا ہے کہ ’قلیل مدت میں اس پر عمل کرنا آسان نہیں ہو گا۔‘
ان کا کہنا تھا کہ موجودہ صورتحال میں پاکستان کے پاس آئی ایم ایف ہی آخری آپشن موجود ہے اور اس میں پاکستان کے دوست ممالک کی جانب سے رول اوور (قرضوں کی ادائیگی موخر کرنا) اور فنانشل گارنٹی پر معاملات پھنسے ہوئے ہیں۔
ان کا کہنا تھا کہ ملک میں سیاسی عدم استحکام اس تاخیر کی ایک بڑی وجہ ہے کیونکہ دوست ممالک کسی ایک فرد نہیں بلکہ حکومت کو مدد فراہم کرتے ہیں اور گذشتہ ایک برس سے یہ پتا نہیں چل رہا کہ اصل حکومت کسی کی ہے۔
ان کا کہنا تھا کہ خطے میں ممالک کے درمیان بننے والے نئے تعلقات میں بھی ہمیں دیکھنا ہو گا کہ ہماری کتنی اہمیت ہے۔ حال ہی میں سعودی عرب اور ایران کے درمیان سفارتی تعلقات کی بحالی سے اب سعودی عرب کی طرف سے پاکستان کو غیر مشروط امداد ملنا کم ہو جائے گی۔
’اگر سعودی عرب کو پاکستان کی پہلے کی طرح ضرورت نہیں ہو گی تو وہ کیوں ہمیں غیر مشروط مدد فراہم کرے گا۔‘
ان کا کہنا تھا کہ دوست ممالک کے ساتھ رول اوور معاملات کا دراومدار پاکستان کی خارجہ پالیسی اور ملکی سیاسی استحکام پر منحصر ہے۔