کراچی: پاکستان کے معروف پرینکسٹر اور یوٹیوب پر پی 'فار پکاؤ' نامی چینل کے بانی نادر علی جنہوں نے 11 سال قبل اپنے کیریئر کا آغاز بہت مشکل حالات میں کیا لیکن اپنی بھرپور محنت ، جدوجہد اور مستقل مزاجی سے آج وہ پاکستان کے معروف کامیڈین اور یوٹیوبر کے طور پر پہچانے جاتے ہیں۔
کامیڈین نادر علی کا تعلق کراچی سے ہے ان کا شمار پاکستان کے کامیاب سوشل میڈیا اسٹار کے طور پر کیا جاتا ہے، یہاں تک کہ ان کے چرچے پڑوسی ملک بھارت میں بھی کئے جاتے ہیں جو اپنی مزاحیہ ویڈیوز سے لوگوں کی توجہ کا مرکز بنے رہتے ہیں۔
انہوں نے پھٹے ہوئے بنیان سے لے کر ایک مہنگی ترین گاڑی کا مالک بننے تک کا سفر کیسے طے کیا؟
باصلاحیت کامیڈین نادر علی نے کہا کہ میں نے بہت مشکل مالی حالات میں اپنے کیریئر کا آغاز کیا اور بہت سے مسائل کا سامنا کرتے ہوئے آج اس مقام پر پہنچا ہوں۔
ایک واقعہ بتاتے ہوئے نادر علی نے کہا کہ ایک وقت ایسا بھی تھا کہ میرے پاس موٹر سائیکل کے پیٹرول کے پیسے نہیں تھے اور میں گھر جانے کیلئے سوک سینٹر سے نارتھ کراچی تک پیدل چل دیا۔
انہوں نے کہا کہ وہ زندگی کا ٹرننگ پوائنٹ تھا جب میں نے ہمت نہ ہارتے ہوئے اپنے سفر کو جاری رکھا، نادر علی نے یو ٹیوب پر نئے آنے والے فنکاروں کو مشورہ دیا کہ وہ دوسروں کی نقل کرنے کے بجائے مستقل مزاجی سے اپنی صلاحیتیوں پر انحصار کریں تو ضرور کامیاب ہوں گے۔
ایک سوال کے جواب میں ان کا کہنا تھا کہ اس فیلڈ میں کام کرنے والوں سے کہتا ہوں کہ اپنے کونٹنٹ میں اپنے کلچر کو پروموٹ کریں، کامیابی حاصل کرنے کیلئے کسی غلط بات کا سہارا نہ لیں، میری ویڈیوز کو لوگ فیملی کے ہمراہ ساتھ بیٹھ کر بھی دیکھ سکتے ہیں۔
واضح رہے کہ اپنے یوٹیوب پر چینل پر نادر علی مزاحیہ ویڈیوز ریلیز کرتے ہیں یہاں یہ بات قابل ذکر ہے کہ ان کے چینل کو اب تک 35 لاکھ سے زائد افراد سبسکرائب کرچکے ہیں جبکہ مجموعی طور پر دیکھا جائے تو ان کے چینل کو اب تک ایک بلین سے زائد ویوز مل چکے ہیں۔
ویڈیو ملاحظہ کریں۔