ہم نے 5 ماہ کے دوران بمشکل ہی ایک دوسرے کو دیکھا ہو گا، طلاق کی خبروں پر اداکارہ فریال محمود بول پڑیں

سوشل میڈیا پر گزشتہ کچھ روز سے اداکارہ فریال محمود اور دانیال راحیل کی علیحدگی کی خبریں وائرل ہورہی تھیں تاہم دونوں کی طرف سے کوئی بیان سامنے نہیں آیا تھا لیکن اب اداکارہ فریال محمود نے بلآخر خاموشی توڑ دی۔

فریال محمود نے تمام تر افواہوں کی تردید کرتے ہوۓ انسٹاگرام پر سٹوری اپ لوڈ کی جس میں انہوں نے لکھا کہ "میں کچھ دنوں سے سوشل میڈیا پر دانیال اور اپنی علیحدگی سے متعلق پوسٹس دیکھ رہی ہوں جو صرف اس وجہ سے پھیلائی جارہی ہیں کیونکہ میں اور دانیال ایک ساتھ تصویریں شیئر نہیں کرتے۔"

اداکارہ نے شدید برہمی کا اظہار کیا اور لکھا "چونکہ آج کل میری اور دانیال کی ایک ساتھ تصاویر سامنے نہیں آرہیں تو آپ لوگ کہیں گے کہ ہمارے درمیان علیحدگی ہوگئی ہے؟"

فریال محمود نے غلط خبریں پھیلانے والوں پر شدید غصے کا اظہار کرتے ہوئے کہا کہ "کیا اب ہمیں آپ لوگوں کو ہماری شادی قائم رہنے کا ثبوت دینا پڑے گا، کیا ہم آپ کی مرضی سے ایک ساتھ وقت گُزاریں گے؟"

اداکارہ کا مزید کہنا تھا کہ "میں اور دانیال اس وقت ایک مشکل وقت سے گُزر رہے ہیں کیونکہ کام کی مصروفیت کی وجہ سے ہی ہم نے گزشتہ 5 ماہ سے بمشکل ہی ایک دوسرے کو دیکھا ہو گا ۔"

انہوں نے یہ بھی کہا کہ "براہِ کرم ہماری شادی کو چھوڑ دیں اور اُن مسائل پر بات چیت کریں جو اس سے کہیں زیادہ اہم ہیں۔"

آخر میں فریال محمود نے انتہائی دکھ بھرے انداز میں کہا کہ "میں ہماری علیحدگی سے متعلق افواہوں کو دیکھ کر بےحد افسردہ ہوئی ہوں۔"

واضح رہے اداکارہ کے شوہر دانیال راحیل نے بھی فریال کی سٹوری کا اسکرین شاٹ اپنے انسٹاگرم کی سٹوری پر اپ لوڈ کیا۔