گزشتہ چند روز سے پاکستان کے نامور اداکار فیروز خان اور ان کی اہلیہ کے مابین علیحدگی کی خبریں سوشل میڈیا پر وائرل ہورہی ہیں تاہم اب اداکار کی اہلیہ علیزے فاطمہ نے شادی کے ٹوٹنے کی خبروں پر اپنی خاموشی توڑ دی، جس سے تمام تر افواہوں کی تردید ہوگئی۔
تفصیلات کے مطابق علیزے نے اپنا انسٹاگرام اکاؤنٹ ڈی ایکٹیویٹ کردیا تھا جبکہ فیروز اور علیزے نے ایک دوسرے کو ان فالو بھی کردیا تھا جبکہ گزشتہ روز علیزے نے اپنا اکاؤنٹ دوبارہ ایکٹیویٹ کیا، انہوں نے انسٹاگرام پروفائل پر اپنا نام ''سیدہ علیزے فیروز خان'' رکھا ہوا ہے، جس سے تمام مداحوں کی تشویش ختم ہوگئی۔
فیروز خان کی اہلیہ نے اپنے انسٹاگرام اکاؤنٹ سے صرف 4 تصاویر کے علاوہ تمام تصویریں ڈیلیٹ کر دی ہیں۔
اکاؤنٹ ایکٹیویٹ کرتے ہی علیزے نے اپنے بیٹے کے ساتھ ایک تصویر شئیر کی جس کے کیپشن میں تحریر کیا کہ ''میں نے خدا سے کہا کہ مجھے ایک ایسا مرد عطا کرے جو ہمیشہ مجھ سے محبت کرے، تو خدا نے مجھے بیٹے سے نوازا''۔
دوسری جانب علیزے کے انسٹاگرام اکاؤنٹ پر فیروز خان کے ہمراہ بھی تصویریں موجود ہیں، اور انہوں نے فیروز خان کو فالو بھی کیا ہوا ہے۔
لیکن کچھ مداح تاحال کنفیوژن کا شکار ہیں، کیونکہ فیروز خان نے انسٹاگرام پر اپنی اہلیہ علیزے فاطمہ کو فالو نہیں کیا ہوا، اور اداکار کے اکاؤنٹ سے دونوں میاں بیوی کی تصاویر بھی غائب ہیں۔
مداح اب بھی اداکار فیروز خان کے مؤقف کا انتظار کر رہے ہیں، اب دیکھنا یہ ہے کہ کب ان کی جانب سے خاموشی ٹوٹے گی۔