کورونا وائرس کے حوالے سے یہ بات مشہور ہے کہ یہ معمر افراد کو زیادہ متاثر کرتا ہے لیکن حقیقت اس کے برعکس ہے، یہ وائرس ہر اس شخص پر وار کرتا ہے جس کی قوت مدافعت کم ہو۔
شمالی ٹیکساس سے تعلق رکھنے والی 24 سالہ خاتون پاؤلا کاسٹیلو کو 27 اپریل کو کورونا وائرس کی علامات کھانسی، سانس لینے میں مشکلات اور بخار کے ساتھ اسپتال کے ایمرجنسی روم میں داخل کیا گیا تھا۔
اس وقت ان خاتون کا خیال تھا کہ یہ بیماری اسے متاثر نہیں کرسکتی اور اسی وجہ سے وہ احتیاطی تدابیر یعنی فیس ماسک استعمال نہیں کر رہی تھیں۔
پاؤلا کا کہنا تھا کہ میں ہمیشہ لوگوں کے ارگرد رہتی تھی مگر میرا خیال تھا کہ میں ٹھیک ہوں، مجھے نہیں لگتا تھا کہ میں اس کا شکار ہوسکتی ہوں، مگر 79 دن اسپتال میں گزارنے کے بعد جہاں وہ موت کے منہ میں پہنچ گئی تھی، پاؤلا کاسٹیلو کو لگتا ہے کہ اس نے جان لیوا غلطی کی تھی۔
انہوں نے کہا شاید اگر میں نے ماہرین کی بات سن کر فیس ماسک کو پہن لیا ہوتا، تو میں ان سب سے بچ جاتی۔
پاؤلا نے ایک مہینے سے زیادہ وقت آئی سی یو، وینٹی لیٹر اور سکون آور ادویات کو استعمال کرتے ہوئے گزارا۔ وینٹی لیٹر سے نکالے جانے کے بعد بھی اسپتال میں روزمرہ کے عام کام جیسے چلنا، بات کرنا اور نگلنے کو سیکھا۔
اگر ہم اسی حوالے سے دیگر واقعات کی بات کریں تو کیلیفورنیا سے تعلق رکھنے والے 51 سالہ ایک شخص نے جون کے آغاز میں ایک دعوت میں شرکت کی اور 20 جون کو وینٹی لیٹر پر جانے کے بعد چل بسا۔
ٹیکساس سے تعلق رکھنے والے 30 سالہ شخص ایک کووڈ 19 پارٹی میں شرکت کے بعد چل بسا اور موت سے چند لمحات قبل اس نے نرس کو کہا تھا میرے خیال میں مجھ سے غلطی ہوئی، میں نے سوچا کہ یہ ایک افواہ ہے، مگر ایسا نہیں تھا۔
یاد رہے بہت سے لوگ اب بھی اس وائرس کو ایک افواہ سمجھ رہے ہیں لیکن حقیقت کچھ اور ہے۔