بھارت کے وزیراعظم نریندر مودی کی پاکستانی منہ بولی بہن امسال رکھشا بندھن پر انہیں خود راکھی باندھیں گی۔ ہندوستان ٹائمز کے مطابق قمر محسن شیخ نامی پاکستانی خاتون وزیراعظم مودی کی منہ بولی بہن ہیں اور 30سال سے زائد عرصے سے ہر رکھشا بندھن پر انہیں راکھی باندھ رہی ہیں۔
ڈیلی پاکستان کی جاری کردہ رپورٹ کے مطابق نیوز ایجنسی اے این آئی سے گفتگو کرتے ہوئے قمر محسن شیخ نے کہا ہے کہ ”اس بار میں نے راکھی اپنے ہاتھوں سے بنائی ہے۔ راکھی باندھنے کے ساتھ میں اپنے بھائی کو زراعت پر لکھی گئی ایک کتاب بھی تحفے میں دوں گی کیونکہ وہ مطالعے کے شوقین ہیں۔“
انہوں نے کہا کہ ”گزشتہ دو تین سال سے کورونا وائرس کی وجہ سے میں نریندر مودی کو راکھی باندھنے نہیں جا سکی تھی تاہم اس سال میں ان سے ملوں گی اور انہیں راکھی باندھوں گی۔ “ رپورٹ کے مطابق محسن قمر شیخ پاکستانی شہری ہیں اور ان کی شادی ایک بھارتی شہری کے ساتھ ہوئی ہے۔ شادی کے بعد سے وہ بھارت میں مقیم ہیں۔
ان کا کہنا تھا کہ ”پہلے میں دعا کرتی تھی کہ وہ گجرات کے وزیراعلیٰ بن جائیں اور وہ بن گئے۔ اس کے بعد میں جب بھی انہیں راکھی باندھتی ، خواہش کرتی کہ وہ بھارت کے وزیراعظم بنیں۔ جواب میں ان کا ردعمل ہمیشہ حوصلہ مندانہ ہوتا اور بالآخر خدا نے میری یہ خواہش بھی پوری کر دی۔ اب وہ بطور وزیراعظم ملک کے لیے قابل ستائش کام کر رہے ہیں۔“