آن لائن انرولمنٹ فارم بورڈ سے الحاق شدہ صرف نجی اسکولوں کے ہی جمع کئے جائیں گے، چیئرمین سید شرف علی شاہ
گورنمنٹ اسکول انرولمنٹ فارم بورڈ کے اکاؤنٹ سیکشن سے حاصل کرکے اسی سیکشن میں جمع کرائیں گے
کراچی …… ثانوی تعلیمی بورڈکراچی نے سائنس اور جنرل گروپ ریگولر جماعت نہم کے سالانہ امتحانات 2024ء کیلئے انرولمنٹ /آن لائن انرولمنٹ فارم جمع کرانے کا شیڈول جاری کر دیا ہے۔آن لائن انرولمنٹ فارم بورڈ سے الحاق شدہ صرف نجی اسکولوں کے ہی جمع کئے جائیں گے جبکہ گورنمنٹ اسکول انرولمنٹ فارم بورڈ کے اکاؤنٹ سیکشن سے حاصل کرکے اسی سیکشن میں جمع بھی کرائیں گے۔چیئرمین میٹرک بورڈ سید شرف علی شاہ نے اسکول سربراہان سے کہا ہے کہ وہ 10اگست سے8ستمبر 2023ء تک اس سال 2000روپے انرولمنٹ کی فیس اور 100روپے کا انرولمنٹ فارم بغیر لیٹ فیس کے جمع کرا سکتے ہیں۔ تفصیلات کے مطابق انرولمنٹ فارم بورڈ آفس بوتھ اور بورڈ سے متصل نیشنل بینک، عسکری بینک، یونائیٹڈ بینک اور حبیب بینک لمیٹڈ سے حاصل کر کے انہی بینکوں میں دی گئی تاریخوں میں جمع کرا ئے جاسکتے ہیں۔ انہوں نے کہا کہ اسکول سربراہان اپنے اتھارٹی لیٹر، سیکرٹری بورڈ کے نام پے آرڈر، بورڈ سے الحاق اور نئے الحاق شدہ اسکولوں کی فوٹو کاپی کے ذریعے انرولمنٹ فارم متعلقہ سیکشن سے تصدیق کرانے کے بعد جمع کرائیں گے۔ اس ضمن میں واضح کیا گیا ہے کہ شیڈول میں دی گئی تاریخ گزرنے کے بعدلیٹ فیس کے ساتھ فارم وصول کئے جائیں گے۔