بھارت سے تعلق رکھنے والے خاکروب خواتین کے ایک گروپ کے 25،25 روپے جمع کر کے خریدے گئے لاٹری ٹکٹ پر 10 کروڑ روپے کا انعام نکل آیا جس نے دیکھتے ہی دیکھتے ان خواتین کو امیر کردیا۔
تفصیلات کے مطابق بھارتی ریاست کیرالہ کی رہائشی 11 خاکروب خواتین نے 25،25 روپے اکٹھا کر کے لاٹری کا ایک ٹکٹ خریدا۔ ان 11 میں سے 1 خاتون ایسی بھی تھیں جن کے پاس اس وقت 25 روپے بھی نہ تھے اور انہوں ٹکٹ میں حصہ ڈالنے کے لیے یہ رقم بھی کسی ساتھی سے ادھار لی-
لیکن پھر قسمت نے پلٹا کھایا اور اسی ٹکٹ پر 10 کروڑ کا انعام نکلتے ہی یہ غریب خواتین لکھ پتی بن گئیں- تمام خواتین کے حصے میں ٹیکس کٹنے کے بعد 63 لاکھ فی کس آئیں گے۔
ان خاکروب خواتین کو روزانہ کی اجرت 250 روپے ملتی ہے جبکہ کچھ رقم یہ کچرا فروخت کر کے بھی کما لیتی ہیں-
تاہم کروڑوں کی انعامی رقم جیتنے کے باوجود 11 خواتین خاکروب دوسرے دن بھی معمول کے مطابق اپنے کام پر پہنچ گئیں۔ خواتین کا ماننا ہے کہ جس کام کی اجرت سے انہوں نے یہ لاٹری ٹکٹ خریدا وہ نہیں چھوڑ سکتیں- اور وہ یہ انعام میں ملنے والی رقم قرض اتارنے، بچوں کی تعلیم اور گھر بنانے پر خرچ کریں گی۔