لاہور تو ڈوب گیا لیکن کراچی کو بھی خطرہ - کراچی میں کل سے کتنے دنوں تک بارش ہوگی؟

گزشتہ روز بارش کی وجہ سے لاہور کے ڈوبنے کی خبریں ہر طرف چھائی رہیں جس میں کئی افسوسناک واقعات نے بھی جنم لیا اور چند افراد اپنی جان سے ہاتھ بھی دھو بیٹھے- لیکن اب ماہرینِ موسمیات کی جانب سے کراچی کے حوالے سے بھی خبردار کیا گیا ہے-

ماہرین موسمیات کا کہنا ہے کہ کراچی میں 7 سے 11 جولائی تک بارش ہو سکتی ہے، انہوں نے وضاحت کی کہ اس وقت خلیج بنگال پر ہوا کا کمزور دباؤ ہے۔ اگر ہوا کا یہ دباؤ گجرات کی طرف بڑھتا ہے تو کراچی میں بارش ہو سکتی ہے۔ ماہرین نے یہ بھی بتایا کہ ابتدائی چند دنوں میں تقریباً 30 سے ​​40 ملی میٹر بارش ہو سکتی ہے۔ تاہم، انہوں نے یقین دلایا کہ اس وقت شدید بارش کی توقع نہیں ہے۔

ماہر موسمیات سردار سرفراز کا کہنا تھا کہ کراچی میں 7 سے 8 جولائی کو ہلکی بارش ہو سکتی ہے اور 9 جولائی کو کچھ علاقوں میں تیز بارش ہو سکتی ہے۔ سمندر سے آنے والی ٹھنڈی ہوائیں دوبارہ زور سے چلنا شروع کر سکتی ہیں۔ چیف میٹرولوجسٹ نے کہا کہ اس وقت وسطی ہندوستان میں مون سون نامی موسمی نظام موجود ہے، اور یہ 6 جولائی یا 7 جولائی کو سندھ میں آ سکتا ہے۔