Getty Images
انڈیا کے دارالحکومت نئی دہلی میں لال قلعہ کے میٹرو سٹیشن کے باہر ایک زور دار دھماکے میں متعدد لوگوں کے ہلاک اور زخمی ہونے کی اطلاعات ہیں۔ یہ دھماکہ شام تقریباً سات بجے ہوا ہے۔
دہلی پولیس کے ترجمان سنجے تیاگی کا کہنا ہے کہ اس دھماکے میں کم از کم آٹھ افراد ہلاک اور 20 زحمی ہوئے ہیں اور دھماکے کی وجہ جاننے کے لیے تحقیقات جاری ہیں۔
ترجمان کے مطابق دھماکہ لال قلعہ کے گنجان آباد علاقے میں ہوا۔ انڈین میڈیا کے مطابق دارالحکومت کے ساتھ ساتھ ممبئی میں بھی ہائی الرٹ جاری کر دیا گیا ہے۔
دہلی کے پولیس کمشنر ستیش گولچہ نے نامہ نگاروں کو بتایا کہ ’یہ دھماکہ ایک سلو موونگ کار میں ہوا ہے۔ جب دھماکہ ہوا تو اس وقت کار میں مسافر موجود تھے۔ دھماکے سے دوسری کاروں میں بھی آگ لگ گئی۔‘
انھوں نے مزید بتایا کہ ’اس دھماکے میں کچھ لوگ ہلاک اور زخمی ہوئے ہیں۔ حالات کا جائزہ لیا رہا ہے اور دھماکے کی ہر پہلو سے جانچ کی جا رہی ہے۔‘
انھوں نے کہا کہ ’کچھ لوگ زخمی ہوئے ہیں اور کچھ کی موت ہو گئی ہے۔ درست اعداد و شمار جلد ہی جاری کیے جائیں گے۔ وزیر داخلہ کو بھی اس بارے میں مسلسل آگاہ کیا جا رہا ہے۔ مستقبل میں جو بھی صورتحال ہو گی، اس بارے جلد آگاہ کر دیا جائے گا۔‘
یہ دھماکہ مبینہ طور پر میٹرو سٹیشن کے باہر ایک کار میں ہوا ہے۔ دھماکے سے نزدیک کھڑی کئی گاڑیوں میں آگ لگ گئی ہے اور فائر بریگیڈ کا عملہ آگ بجھانے میں مصروف ہے۔
Getty Images
انڈیا کے وفاقی وزیر داخلہ امیت شاہ نے دہلی کے ایل این جے پی ہسپتال کا دورہ کیا جہاں دھماکے میں زخمی ہونے والوں کا علاج کیا جا رہا ہے۔
انڈیا کی مرکزی پولیس فورس نے کہا ہے کہ دہلی بھر میں کئی اہم مقامات کو ہائی الرٹ پر رکھا گیا ہے۔
سنٹرل انڈسٹریل سکیورٹی فورس (سی آئی ایس ایف) نے ایکس پر ایک سوشل میڈیا پوسٹ میں کہا کہ ’دہلی کے اندرا گاندھی بین الاقوامی ہوائی اڈے کے ساتھ ساتھ دہلی میٹرو، لال قلعہ اور سرکاری عمارتیں اب ہائی الرٹ پر ہیں۔‘
بیان میں کہا گیا ہے کہ ’صورتحال کی مسلسل نگرانی کی جا رہی ہے اور اہلکار تیار ہیں۔‘
دہلی میں ہونے والے دھماکے کے بعد ایک سینئر پولیس عہدیدار نے بتایا کہ شمالی انڈیا کی ریاست اتر پردیش میں بھی ’حساس مذہبی مقامات، حساس اضلاع اور سرحدی علاقوں‘ پر سکیورٹی بڑھا دیگئی ہے۔
اتر پردیش میں تاج محل جیسے مشہور مقامات ہیں اور یہ ایک گنجان آباد ریاست ہے۔
ایڈیشنل ڈائریکٹر جنرل امیتابھ یش نے میڈیا کو بتایا کہ پورے اتر پردیش میں تمام سکیورٹی ایجنسیوں اور ضلعی پولیس کو ہائی الرٹ پر رکھا گیا ہے۔
انڈین وزیر اعظم نریندر مودی نے دہلی دھماکے میں اپنے پیاروں کو کھونے والوں سے تعزیت کا اظہار کیا ہے۔
انھوں نے کہا ’آج شام دہلی میں ہوئے دھماکے میں اپنے عزیزوں کو کھونے والوں سے تعزیت۔ زخمیوں کی جلد صحت یابی کے لیے دعا گو ہوں۔ متاثرہ افراد کی حکام کی طرف سے مدد کی جا رہی ہے۔ وزیر داخلہ امیت شاہ اور دیگر عہدیداروں کے ہمراہ صورتحال کا جائزہ لیا ہے۔‘
عینی شاہدوں کے مطابق دھماکے سے آس پاس کی عمارتیں لرز گئیں۔
دھماکے کے بعد لال قلعہ کے سامنے موجود چاندنی چوک کے بازار میں افراتفری مچ گئی اور دوکانیں بند کر دی گئیں۔
ابتدائی طور پردھماکے کی نوعیت کے بارے میں کچھ پتہ نہیں چل سکا ہے۔
دلی پولیس کی سپیشل سیل اور نیشنل انوسٹیگیشن ایجنسی کے اہلکار موقع پر پہنچ گئے ہیں اور جائے وقوعہ پر جانچ کر رہے ہیں۔
کانگرس کے رہنما راہول گاندھی نےاس واقعہ پر افسوس کا اظہار کیا ہے۔ ایکس پر پوسٹ میں انھوں نے کہا کہ ’دہلی کے لال قلعہ میٹرو سٹیشن کے قریب کار دھماکے کی خبر انتہائی تکلیف دہ اور تشویشناک ہے۔ اس المناک حادثے میں کئی معصوم جانوں کے ضیاع کی خبر افسوسناک ہے۔‘
’خالصتان، آئی ایس آئی اور پاکستانی دستی بم‘: انڈین پنجاب میں ہونے والے 14 ’بے ضرر‘ بم دھماکوں کے پیچھے کون ہے؟’امن کی ہر کوشش کے جواب میں دھوکہ ملا‘: مودی کے سیاست اور کرکٹ پر تبصرے، پاکستانی دفترِ خارجہ برہمانڈیا کی خفیہ ایجنسی ’را‘ کیسے بنی اور یہ کیسے کام کرتی ہے؟مالیگاؤں بم دھماکہ کیس کا فیصلہ 17 سال بعد سُنا دیا گیا، پرگیہ ٹھاکر اور کرنل پروہت سمیت تمام سات ملزمان بری’دھماکے کی آواز زوردار تھی‘
کانگریس کے ترجمان پون کھیرا نے اس واقعے پر افسوس کا اظہار کیا ہے۔
انھوں نے سوشل میڈیا ویب سائٹ ایکس پر لکھا کہ ’لال قلعے میٹرو سٹیشن کے قریب کار میں دھماکے کی خبر انتہائی افسوسناک ہے۔ ابتدائی رپورٹس کے مطابق متعدد افراد اپنی جانوں سے ہاتھ دھو بیٹھے ہیں۔‘
انھوں نے مطالبہ کیا کہ ’حکومت کو اس واقعے کی مکمل اور فوری تحقیقات کو یقینی بنانا چاہیے۔‘
عینی شاہد راجدھر پانڈے نے خبر رساں ادارے اے این آئی کو بتایا کہ ’ہم نے آگ کے شعلے دیکھے۔۔۔ میں نے اسے اپنی چھت سے دیکھا۔ اس کے بعد میں یہ دیکھنے کے لیے نیچے آیا کہ کیا ہو رہا ہے۔ ایک بہت زوردار آواز آئی۔ عمارت کی کھڑکیاں لرز اُٹھیں۔‘
انھوں نے بتایا کہ ’میرا گھر گرودوارے کے قریب ہے۔‘
Getty Images
ولی الرحمان نامی ایک مقامی دکاندار نے اے این آئی کو بتایا کہ ’جب دھماکہ ہوا تو میں دکان میں بیٹھا ہوا تھا۔ دھماکہ بہت زوردار تھا، ایسا میں نے پہلے کبھی نہیں سنا۔‘
انھوں نے مزید بتایا کہ ’دھماکے کی آواز سن کر میں تین بار گِر پڑا۔ اس کے بعد آس پاس کے سبھی لوگ بھاگنے لگے۔‘
دلی فائر سروس نے بی بی سی ہندی کو بتایا ہے کہ لال قلعہ میٹرو سٹیشن کے قریب ایک کار میں دھماکہ ہوا ہے۔
دلی فائر سروس نے بی بی سی ہندی کو تصدیق کی کہ اسے شام چھ بج کر 55 منٹ پر کال موصول ہوئی۔
دلی فائر سروس نے کہا کہ اسے ایک کال موصول ہوئی جس میں بتایا گیا کہ لال قلعہ میٹرو سٹیشن کے گیٹ نمبر ایک کے قریب ایک کار میں دھماکہ ہوا ہے۔
دھماکے کے بعد لگ بھگ چھ گاڑیوں میں آگ لگ گئی اور قریبی گاڑیوں کو بھی نقصان پہنچا۔
دہلی فائر سروس کا کہنا ہے کہ ’دھماکے کی اطلاع کے بعد سات آگ بجھانے والی گاڑیاں لال قلعہ میٹرو سٹیشن پر بھیجی گئی ہیں۔‘
اس خبر سے متعلق تفصیلات ابھی سامنے آ رہی ہیں اوریہ خبر اپ ڈیٹ کی جا رہی ہے۔
دلی فسادات: گرفتار افراد عدالت میں پیش، سخت سکیورٹی کے باوجود خوف کی فضا قائمانڈیا اسرائیل تعلقات کی سالگرہ: دلی میں اسرائیلی سفارت خانے کے قریب بم دھماکہ’خالصتان، آئی ایس آئی اور پاکستانی دستی بم‘: انڈین پنجاب میں ہونے والے 14 ’بے ضرر‘ بم دھماکوں کے پیچھے کون ہے؟’امن کی ہر کوشش کے جواب میں دھوکہ ملا‘: مودی کے سیاست اور کرکٹ پر تبصرے، پاکستانی دفترِ خارجہ برہممالیگاؤں بم دھماکہ کیس کا فیصلہ 17 سال بعد سُنا دیا گیا، پرگیہ ٹھاکر اور کرنل پروہت سمیت تمام سات ملزمان بری