بھارت کی ریاست اتر پردیش میں ایک افسوسناک واقعہ سامنے آیا ہے جہاں ایک ماں نے اپنی نومولود بچی کو فریج میں رکھ دیا اور خود بھول گئی۔ یہ واقعہ ضلع مرادآباد میں پیش آیا اور خوش قسمتی سے بچے کی جان بروقت بچالی گئی۔
بھارتی میڈیا کے مطابق یہ واقعہ جمعہ کی رات ہوا جب خاتون نے بچی کو سلانے کے بعد غیر ارادی طور پر اسے ریفریجریٹر میں رکھ دیا۔ کچھ دیر بعد بچی کے ہچکیوں اور رونے کی آواز سن کر گھر والوں نے تلاش شروع کی، لیکن وہ کہیں نظر نہ آئی۔ آخرکار فریج کھولنے پر بچی بے ہوش حالت میں ملی۔
اہلخانہ نے فوری طور پر بچی کو اسپتال منتقل کیا جہاں ڈاکٹروں نے بروقت طبی امداد فراہم کی۔ اسپتال حکام کے مطابق اب نومولود کی حالت خطرے سے باہر ہے۔
پولیس کا کہنا ہے کہ خاتون حالیہ زچگی کے بعد شدید ذہنی دباؤ اور نفسیاتی مسائل کا شکار تھی۔ اسے بھی علاج کے لیے اسپتال منتقل کر دیا گیا ہے تاکہ مستقبل میں اس نوعیت کی کوئی اور صورتحال پیش نہ آئے۔
یہ واقعہ نہ صرف گھر والوں بلکہ پورے علاقے کے لیے ایک چونکا دینے والا لمحہ ثابت ہوا ہے، جس نے زچگی کے بعد خواتین کی ذہنی صحت پر توجہ دینے کی اہمیت کو اجاگر کیا ہے۔