رائیونڈ میں گزشتہ ہفتے 30 روپے کے تنازع پر دو بھائیوں کو قتل کرنے والے ملزمان اویس اور شہزاد اپنے ہی ساتھیوں کی فائرنگ سے مارے گئے۔
ذرائع کے مطابق سی سی ڈی چوہنگ پولیس گرفتار ملزمان کو نشاندہی کے لیے رائیونڈ لے گئی اس دوران ان کے ساتھیوں نے حملہ کر کے ملزمان کو چھڑوانے کی کوشش کی۔ فائرنگ کے تبادلے میں زیرِ حراست ملزمان اویس اور شہزاد اپنے ہی ساتھیوں کی گولیوں کا نشانہ بن کر موقع پر ہلاک ہوگئے۔
پولیس کے مطابق ملزمان کے ساتھی توقیر نے دیگر ساتھیوں کے ہمراہ حملہ کیا اور بعد ازاں موقع سے فرار ہوگئے۔ پولیس نے علاقے میں سرچ آپریشن شروع کر دیا ہے اور فرار ملزمان کی تلاش جاری ہے۔
واضح رہے کہ ہلاک ہونے والے اویس اور شہزاد نے چند روز قبل محض 30 روپے کی معمولی رنجش پر دو بھائیوں کو قتل کر دیا تھا۔