خیبر پختونخوا حکومت نے تیراہ واقعے کے متاثرہ خاندانوں سے افسوس کا اظہار کرتے ہوئے مرحومین کے لواحقین کے لیے ایک کروڑ جبکہ زخمیوں کے لیے 25 لاکھ روپے امداد کا اعلان کردیا۔
وزیراعلیٰ کے مشیر برائے اطلاعات بیرسٹر سیف کے مطابق خیبر پختونخوا کے وزیراعلیٰ علی امین گنڈاپور تیراہ واقعہ سے متعلق امور کی خود نگرانی کر رہے ہیں اور متعلقہ انتظامیہ کے ساتھ مسلسل رابطے میں ہیں، تیراہ واقعہ پر وزیراعلیٰ خیبر پختونخوا نے قبائلی عمائدین کا جرگہ طلب کیا ہے جس میں ان کو سنا جائے گا۔
بیرسٹر سیف نے کہا کہ خیبر پختونخوا حکومت نے ایسے واقعات کی روک تھام کے لیے گزشتہ ہفتے اے پی سی بلائی تھی لیکن گورنر اور اپوزیشن جماعتوں نے غیر سنجیدگی کا مظاہرہ کرکے اے پی سی کا بائیکاٹ کیا۔
انہوں نے کہا کہ خیبر پختونخوا حکومت متاثرہ خاندانوں کے غم میں برابر کی شریک ہے، صوبائی حکومت دکھ کی اس گھڑی میں متاثرہ خاندانوں کے شانہ بشانہ کھڑی ہے۔