عوام پاکستان پارٹی کے مرکزی سیکریٹری جنرل مفتاح اسماعیل نے چینی بحران پر حکومت کو آڑے ہاتھوں لے لیا۔ انہوں نے کہا کہ حکومت کی ناقص پالیسیوں کی وجہ سے ملک میں چینی کی قلت پیدا ہوئی اور قیمت 200 روپے فی کلو تک پہنچ گئی۔انہوں نے مطالبہ کیا کہ چینی بحران کے ذمہ داروں کے خلاف فوری کارروائی کی جائے۔
مفتاح اسماعیل نے کراچی پریس کلب میں پریس کانفرنس سے خطاب کرتے ہوئے کہا کہ شہباز شریف کی دو شوگر ملز چینی برآمد کرتی ہیں اور اسحاق ڈار شوگر ایڈوائزری بورڈ کے چیئرمین ہوتے ہوئے چینی برآمد کی اجازت دیتے رہے۔
ایف بی آر کے اختیارات کے حوالے سے بات کرتے ہوئے انہوں نے کہا کہ ایف بی آر کے اختیارات سے کاروباری طبقہ خوفزدہ ہے اس پر مشاورت ہونی چاہیے تاکہ تاجر برادری کو اعتماد میں لیا جا سکے۔
مفتاح اسماعیل نے سابق وفاقی وزراء طارق فضل چوہدری اور انوشہ رحمان کی جانب سے بے نظیر انکم سپورٹ پروگرام کے تحت نشوونما پروگرام سے متعلق لگائے گئے الزامات کو بے بنیاد قرار دیتے ہوئے کہا کہ ان دونوں رہنماؤں کو مجھ سے معافی مانگنی چاہیے بصورت دیگر وہ ان کے خلاف عدالت جائیں گے۔