حمیرا اصغر کے اہل خانہ لاش وصول کرنے کراچی پہنچ گئے، ’2024 سے رابطے منقطع تھے‘

کراچی کے فلیٹ میں مردہ پائی جانے والی اداکارہ حمیرا اصغر کے بھائی نوید اصغر کراچی پہنچ گئے ہیں تاکہ اپنی بہن کی میت وصول کر کے اسے لاہور منتقل کریں۔

پولیس سے بات کرتے ہوئے نوید اصغر نے بتایا کہ ان کے والد اور عمر رسیدہ والدہ صدمے کی حالت میں ہیں اور طبی وجوہات کی بنا پر کراچی سفر نہیں کر سکے۔

انہوں نے کہا کہ والدین کو کچھ تسلی دینے کے بعد وہ اکیلے کراچی روانہ ہوئے تاکہ بہن کی میت لے جا سکیں۔ نوید اصغر کی جانب سے قانونی کارروائی مکمل کیے جانے کے بعد امکان ہے کہ حمیرا اصغر کی میت آج رات لاہور روانہ کی جائے گی۔

اداکارہ حمیرہ اصغر کے اہلخانہ نے ایس ایس پی ساؤتھ سمیت دیگر افسران سے ملاقات کی

ایس ایس پی ساؤتھ مہزور علی نے اپنے دفتر میں میڈیا سے گفتگو کرتے ہوئے کہا کہ حمیرا اصغر کے بھائی اور بہنوئی کراچی آئے ہیں اور قانونی کارروائی جاری ہے۔

ان کے مطابق ورثا میت لاہور لے جانا چاہتے ہیں، انہوں نے فوری کسی شک و شبے کا اظہار نہیں کیا۔

انہوں نے کہا کہ اکتوبر 2024 کے بعد سے خاتون کے رابطے منقطع تھے۔ حمیرا اصغر خود فیملی سے رابطہ کرتی تھیں، فیملی ان سے رابطے میں نہیں رہتی تھی۔

ایس ایس پی کا کہنا تھا کہ جس عمارت میں حمیرا ارشد کا فلیٹ تھا وہاں ہر فلور پر دو فلیٹس بنے ہیں۔ پڑوس کے فلیٹ میں مقیم افراد بھی فروری 2025 میں بیرون ملک سے واپس آئے تھے۔ ممکنہ طور پر لاش سے اٹھنے والا تعفن اسی وجہ سے کسی کو محسوس نہیں ہوا۔