فیلڈ مارشل عاصم منیر نے کہا ہے کہ انڈیا کی طرف سے دوطرفہ فوجی کشیدگی میں کسی تیسرے فریق کو شامل کرنا، اس کی بلاک پولیٹکس کو فروغ دینے کی بے بنیاد کوشش ہے۔پاکستانی فوج کے شعبہ تعلقات عامہ (آئی ایس پی آر) کی جانب سے جمعرات کو جاری ہونے والے بیان کے مطابق فیلڈ مارشل عاصم منیر کی زیرصدارت کور کمانڈرز کانفرنس کا انعقاد ہوا۔ جس میں انڈین سپانسرڈ پراکسیوں کے ہاتھوں حالیہ دہشت گردانہ حملوں میں شہید ہونے والوں کے ایصالِ ثواب کے لیے فاتحہ خوانی کی گئی۔
فورم نے دہشت گرد پراکسیوں کے خلاف فورسز کی حالیہ کامیابیوں کا جائزہ لیا اور عزم کیا کہ ’ہمارے شہدا کا خون رائیگاں نہیں جائے گا۔‘
’پاکستان کے عوام کا تحفظ اور سلامتی مسلح افواج کی اولین ترجیح ہے۔‘فورم نے اس بات پر زور دیا کہ ’انڈین حمایت یافتہ اور سپانسرڈ پراکسیز کے خلاف ہر سطح پر فیصلہ کن اور جامع کارروائیاں جاری رکھنا ناگزیر ہے۔‘’پہلگام واقعے میں واضح شکست کے بعد انڈیا اب فتنہ الخوارج اور فتنہ الہندوستان کی پراکسیز کے ذریعے اپنے مذموم ایجنڈے کو مزید آگے بڑھانے کی کوشش کر رہا ہے۔‘بیان کے مطابق آرمی چیف نے وزیراعظم پاکستان کے ہمراہ ایران، ترکیہ، آذربائیجان، سعودی عرب اور متحدہ عرب امارات کے حالیہ کامیاب دوروں پر پاکستان کے فعال سفارتی کردار کی تفصیلات سے فورم کو آگاہ کیا۔فورم کو آرمی چیف کے دورہ امریکہ کے بارے میں بھی بریفنگ دی گئی۔ دورہ امریکہ کے دوران اعلیٰ سطحی امریکی قیادت کو پاکستان کے دو طرفہ معاملات، علاقائی اور بین الاقوامی امور پر پاکستان کا بامقصد موقف براہِ راست پیش کیا گیا۔فورم نے مشرق وسطیٰ اور ایران کی حالیہ پیش رفت کے تناظر میں، داخلی و خارجی سلامتی کے اُمور کا تفصیلی جائزہ لیا، اور ’طاقت کے استعمال‘ کے بڑھتے ہوئے عالمی رجحان کو بحثیت ایک ترجیحی پالیسی ٹول کے طور پر استعمال کرنے پر تشویش کا اظہار کیا۔فورم نے کہا کہ یہ بدلتا رجحان پاکستان کے لیے نہ صرف خود انحصاری کی صلاحیتوں کو بڑھانے بلکہ قومی اتحاد اور عزم کی اہمیت کو ناگزیر کرتا ہے۔آئی ایس پی آر کے مطابق فیلڈ مارشل عاصم منیر کا کہنا تھا کہ ’انڈیا کی طرف سے دوطرفہ فوجی کشیدگی میں کسی تیسرے فریق کو شامل کرنا، اس کی بلاک پولیٹکس کو فروغ دینے کی بے بنیاد کوشش ہے۔‘’اس بھونڈی کوشش کا مقصد انڈیا کا خطے میں نیٹ سیکورٹی پرووائڈر کے خود ساختہ کردار کو گمراہ طور پر پیش کرنا ہے۔‘فورم نے دہشت گرد پراکسیوں کے خلاف فورسز کی حالیہ کامیابیوں کا جائزہ لیا اور عزم کیا کہ ’ہمارے شہدا کا خون رائیگاں نہیں جائے گا۔‘ (فوٹو: آئی ایس پی آر)انہوں نے کہا کہ درحقیقت دنیا واضح طور پر انڈیا کے توسیع پسندانہ عزائم اور ہندوتوا انتہاپسندی کے خطرناک رجحانات سے بدظن ہوتی جا رہی ہے۔فورم کو جنگ کی بدلتی ہوئی نوعیت اور ابھرتے ہوئے خطرات کے پیش نظر پاکستانی فوج کی حکمت عملی اور جدتوں کے بارے میں بریف کیا گیا۔آرمی چیف نے ٹرائی سروسز ہم آہنگی کو مزید مضبوط کرنے میں بحریہ اور فضائیہ کی قیادت کو بھی سراہا۔کانفرنس کے اختتام پر آرمی چیف نے ملک کو درپیش تمام خطرات کے خلاف پاکستانی فوج کی آپریشنل تیاریوں پر مکمل اعتماد کا اظہار کیا۔