چین نے بھارت کے زیرِ قبضہ اروناچل پردیش کو ’’زنگنان‘‘ کا نام دیتے ہوئے اسے اپنا علاقہ قرار دے دیا ہے۔ چینی وزارتِ خارجہ نے واضح الفاظ میں کہا ہے کہ یہ علاقہ تاریخی، جغرافیائی اور انتظامی اعتبار سے چین کا حصہ ہے، اور ان مقامات کو چینی نام دینا چین کا اندرونی معاملہ ہے۔بیجنگ سے جاری سرکاری بیان میں کہا گیا کہ ’’یہ اقدام چین کے خودمختار انتظامی دائرہ اختیار کے تحت کیا گیا ہے اور اس کا مقصد خطے میں تاریخی و ثقافتی شناخت کو اجاگر کرنا ہے۔‘‘
واضح رہے کہ بھارت اروناچل پردیش کو اپنی ریاست قرار دیتا ہے، جبکہ چین اسے جنوبی تبت کا حصہ مانتا ہے۔ اس معاملے پر دونوں ممالک کے درمیان پہلے ہی کشیدگی موجود ہے۔
دفاعی ماہرین کے مطابق پاکستان کے خلاف حالیہ بھارتی جارحیت کے بعد چین کی یہ جارحانہ سفارتی پوزیشن مودی حکومت کے لیے بڑا دھچکا ہے۔تجزیہ کاروں کا کہنا ہے کہ بھارتی حکومت نے خطے کے تقریباً ہر ملک کے ساتھ تنازع کھڑا کرکے یہ ثابت کر دیا ہے کہ وہ امن کی خواہاں نہیں۔