خیبرپختونخوا میں بارش کا نیا سلسلہ شروع، سیاحتی مقامات پر رش بڑھ گیا

صوبہ خیبرپختونخوا میں بارش اور تیز ہواوں کا نیا سلسلہ داخل ہو گیا ہے عید کے تیسرے روز سے میدانی علاقوں میں بارش کے بعد موسم خوشگوار ہو گیا ہے جبکہ بالائی علاقوں میں سردی لوٹ آئی ہے۔پچھلے 24 گھنٹے کے دوران پشاور، مردان، صوابی، نوشہرہ، بنوں اور ڈی آئی خان میں وقفے وقفے سے بارش کے ساتھ تیز ہواؤں کا سلسلہ جاری ہے جبکہ ملاکنڈ اور سوات کے بالائی علاقوں میں بھی ہلکی بوندا باندی ہوئی۔ چراٹ ، پشاور اور ڈی آئی خان میں ایک ملی میٹر بارش ریکارڈ کی گئی ہےاور محکمہ موسمیات کا کہنا ہے کہ ملاکنڈ، چترال، دیر، سوات اور گلیات میں اج مزید بارش کا امکان ہے۔

بارش اور ہوائیں چلنے کے بعد درجہ حرارت بھی کافی گر گیا ہے جبکہ بالائی علاقوں گلیات، ناران، کمراٹ، سوات اور کالام میں سردی میں اضافہ ہوا ہے۔خیبرپختونخوا کے سیاحتی مقامات میں بارش کے بعد رش میں اضافہ ہو گیا ہے۔ عید کے صرف تین دنوں میں 3 لاکھ 6 ہزار 215 سیاح سیر کے لیے گئے۔ دو لاکھ گیارہ ہزار سیاحوں نے سوات کا رخ کیا جبکہ وادی ناران میں 4 ہزار 111 سیاح سیر کے لیے پہنچے۔

محکمہ سیاحت کا کہنا ہے کہ عید کے صرف تین دنوں میں 3 لاکھ 6 ہزار 215 سیاح مختلف علاقوں میں پہنچے (فوٹو: اے پی پی)

محکمہ سیاحت کے مطابق گلیات میں 28 ہزار سیاح گئے اور کمراٹ کا رخ  16 ہزار 400 سیاحوں نے کیا جبکہ 71 غیر ملکی سیاح بھی خیبرپختونخوا کی سیر کرنے ائے۔ ترجمان محکمہ سیاحت سعد بن اویس کا کہنا ہے کہ بارش کے باوجود سیاحتی پوائنٹس پر رش بڑھ رہا ہے۔

 سوات اور ناران میں رش کی وجہ سے ٹریفک کی روانی متاثر ہوئی تاہم ٹریفک رواں دواں رکھنے کے لیے محکمہ سیاحت کے انتظامی اہلکار اور ٹریفک پولیس کے اہلکار موجود ہیں۔ٹورزم اتھارٹی کا کہنا ہے کہ بارش کی وجہ سے سیاحتی مقامات کی سڑکیں بند ہونے کی کوئی اطلاعات نہیں ملی تاہم ضلعی انتظامیہ کسی بھی ناخوشگوار واقعہ سے نمٹنے کے لئے الرٹ ہے۔

ٹورزم اتھارٹی کا کہنا ہے کہ بالائی حصوں میں کچھ مقامات پر بارش کے بعد لینڈ سلائڈنگ ہوئی (فوٹو: ٹورزم اتھارٹی)

لینڈ سلائڈنگ سے شاہراہیں بند

بالائی حصوں میں کچھ مقامات پر بارش کے بعد لینڈ سلائڈنگ ہوئی جس کی وجہ سے ٹریفک معطل ہے۔ اپر چترال تریچ، کھوژ، سور لاسپور اور یارخون گاؤں کے چند مقامات پر لینڈ سلائڈنگ سے روڈز بند ہیں۔ ان مقامات میں برفانی تودے گرنے کی وجہ سے مرکزی شاہراہ بھی دو روز سے ٹریفک کے لئے بند ہے تاہم انتظامیہ کی جانب سے شاہراہوں کو کھولنے کے لئے کام جاری ہے۔