وزیراعظم شہباز شریف نے عوام کو ریلیف دینے کے لیے بڑا فیصلہ کرتے ہوئے پیٹرولیم مصنوعات کی قیمتیں تو برقرار رکھیں لیکن اس کا فائدہ بجلی کے بلوں میں کمی کی صورت میں منتقل کرنے کی حکمت عملی اپنانے کا اعلان کر دیا۔
وزیراعظم آفس کی جانب سے جاری اعلامیے کے مطابق حکومت ایک ایسا پیکج تیار کر رہی ہے جو بجلی کے نرخوں میں کمی لا کر عوام کو حقیقی معنوں میں ریلیف فراہم کرے گا۔ اس حوالے سے باضابطہ اعلان آئندہ چند ہفتوں میں متوقع ہے، اور وزیراعظم جلد قوم کو اس حوالے سے اعتماد میں لیں گے۔
شہباز شریف کا کہنا ہے کہ حکومت نے اقتدار سنبھالتے ہی عوام کو مہنگائی کے بوجھ سے نکالنے کا عہد کیا تھا اور اس وعدے کو عملی جامہ پہنانے کے لیے بجلی کے نرخ کم کرنے کی جامع حکمت عملی ترتیب دی جا رہی ہے۔
ذرائع کے مطابق، عالمی منڈی میں خام تیل کی قیمتوں میں کمی کی وجہ سے امکان تھا کہ پیٹرولیم مصنوعات کی قیمتوں میں نمایاں کمی کی جائے گی، جس میں پیٹرول 13 روپے فی لیٹر اور ڈیزل 10 روپے سستا ہونے کی توقع تھی۔ تاہم، حکومت نے پیٹرولیم مصنوعات کی قیمتوں کو برقرار رکھتے ہوئے یہ فائدہ بجلی کے بلوں میں رعایت کی شکل میں عوام کو دینے کا فیصلہ کیا ہے۔
خیال رہے کہ یکم مارچ کو پیٹرول کی قیمت میں معمولی 50 پیسے فی لیٹر کمی کی گئی تھی، جس کے بعد پیٹرول 255 روپے 63 پیسے فی لیٹر پر برقرار ہے، جبکہ ہائی اسپیڈ ڈیزل کی قیمت میں 5 روپے 31 پیسے کی کمی کے بعد یہ 258 روپے 64 پیسے فی لیٹر میں دستیاب ہے۔