سو ایکڑ کا رقبہ دانش یونیورسٹی کے نام مختص، قابل اور مستحق طلبہ کیلئے داخلہ مفت ہو گا، وزیراعظم

وزیراعظم شہباز شریف نے کہا ہے کہ دانش یونیورسٹی میں صرف میرٹ پر داخلہ ملے گا، یونیورسٹی میں مستحق اور لائق طلبہ کو تعلیم سے آراستہ کیا جائے گا۔

وزیراعظم نے کہا کہ قابل، ذہین اور مستحق طلبہ کے لئے داخلہ مفت ہوگا،وزیر اعظم شہباز شریف نے دانش یونیورسٹی کے سنگِ بنیاد کی تقریب سے خطاب میں کہا کہ دانش یونیورسٹی کا انڈوومنٹ فنڈ ہو گا جس میں حکومت رقم دے گی۔

وزیراعظم شہباز شریف نے کہا ہے کہ دانش یونیورسٹی کیلئے 100 ایکڑ رقبہ مختص کیا گیا ہے، دانش یونیورسٹی عالمی سطح پر ملک کا نام روشن کرے گی۔یونیورسٹی میں بہترین تعلیم، اساتذہ اور ریسرچ اینڈ ڈویلپمنٹ سینٹرز ہوں گے،دانش یونیورسٹی کا مرکزی نکتہ اپلائیڈ سائنسز ہیں۔

انہوں نے کہا کہ انشاء اللہ 14 اگست 2026ء کو اس یونیورسٹی کا پہلا سیکشن فعال ہو جائے گا۔یہ یونیورسٹی 190 ملین پاؤنڈ یعنی 60 ارب روپے کی لاگت سے بنائی جا رہی ہے،وزیراعظم نے کہا کہ جسٹس قاضی فائز عیسیٰ اور چیف جسٹس یحییٰ آفریدی کا رقم قومی خزانے میں منتقل کرنے پر شکر گزار ہوں۔

انہوں نے کہا کہ تحقیق اور جدید سائنسز کے حوالے سے پاکستان میں ایسی درسگاہ موجود نہیں، اعلیٰ تعلیم یافتہ اساتذہ اور فیکلٹی کو بھرتی کیا جائے گا، یونیورسٹی جدید ٹیکنالوجی اور جدید تحقیقی آلات سے آراستہ ہو گی، وزیراعظم نے کہا کہ دانش یونیورسٹی دنیا کے ممتازتعلیمی اداروں کے ہم پلہ ہو گی۔