آئی سی سی چیمپئنز ٹرافی 2025 کے چوتھے اور گروپ بی کے دوسرے میچ میں آسٹریلیا نے انگلینڈ کو پانچ وکٹوں سے شکست دے دی ہے۔سنیچر کو لاہور کے قذافی سٹیڈیم میں آسٹریلیا نے 352 رنز کا بھاری بھرکم ہدف 48 ویں اوور کی تیسری گیند پر حاصل کر لیا۔ جوش انگلس نے ناقابل شکست 120 رنز بنائے اور گلِن میکسویل 32 رنز کے ساتھ ناٹ آؤٹ رہے۔
قبل ازیں آسٹریلیا نے ٹاس جیت کر پہلے بولنگ کا فیصلہ کیا تھا جو صحیح ثابت نہ ہوا اور انگلینڈ نے بین ڈکٹ کے 165 رنز کی بدولت 50 اوورز میں 351 رنز کا بڑا سکور بنا لیا۔
کینگروز کی جانب سے بین ڈوارشیوز نے تین اور ایڈم زمپا نے دو وکٹیں حاصل کیں۔اس میچ میں مجموعی طور پر707 رنز بنے جو ایک ریکارڈ ہے۔ اس کے علاوہ آسٹریلیا آئی سی سی چیمپئنز ٹرافی کی تاریخ کا سب سے بڑا ہدف حاصل کرنے والی ٹیم بن گئی ہے جبکہ اس سے پہلے انگلینڈ ٹورنامنٹ کی تاریخ میں 350 رنز بنانے والے پہلی ٹیم بنی ہے۔انگلینڈ کی جانب سے بین ڈکٹ نے 165 رنز کی شاندار اننگز کھیلی۔ (فوٹو: اے ایف پی)آسٹریلیا کی اننگز352 رنز کے تعاقب میں آسٹریلوی اوپنرز میدان میں اترے تو انہوں نے ابتدا سے ہی جارحانہ بیٹنگ شروع کر دی اور رن ریٹ کو گرنے نہ دیا۔ لیکن چوتھے اوور میں جوفرا آرچر نے ٹریوس ہیڈ کو آؤٹ کر دیا جبکہ اس سے اگلے ہی اوور میں سٹیو سمتھ کو مارک وڈ نے کیچ آؤٹ کر دیا۔آسٹریلیا کے دو بڑے بیٹرز کا آؤٹ ہونا ٹیم کے لیے ایک جھٹکا تھا لیکن میتھیو شارٹ نے مارنس لبوشین کے ساتھ مل کر نہ صرف 95 رنز کی شراکت داری قائم کی بلکہ رن ریٹ کو بھی بڑھنے نہ دیا۔ لبوشین 47 رنز بنا کر عادل رشید کی گیند پر کیچ آؤٹ ہوئے۔ اس کے چند ہی اوورز بعد لیام لیونگسٹون نے میتھیو شارٹ کو بھی پویلین روانہ کر دیا۔ انہوں نے 66 گیندوں پر 63 رنز بنائے۔اس مرحلے پر لگ رہا تھا کہ انگلینڈ نے میچ پر اپنی گرفت مضبوط کر لی ہے اور آسٹریلیا یہ بڑا ہدف حاصل نہیں کر پائے گا۔ لیکن پھر وہ ہوا جس کے لیے آسٹریلوی کھلاڑی جانے جاتے ہیں۔ اس اعصاب شکن مرحلے پر جوش انگلس اور الیکس کیری نے اپنے حواس قابو میں رکھے اور انگلینڈ کے بولرز کو خود پر حاوی نہ ہونے دیا۔دونوں بیٹرز نے چھکوں چوکوں کی بارش کر کے میچ کا مومینٹم اپنے حق میں کر لیا۔ دونوں کے درمیان 146 رنز کی فیصلہ کن شراکت داری قائم ہوئی۔ کیری 69 رنز بنا کر آؤٹ ہوئے۔ایلکس کیری 69 رنز بنا کر آؤٹ ہوئے۔ (فوٹو: اے ایف پی)اس کے بعد میکسویل میدان میں آئے اور اپنی جارحانہ شارٹس سے آسٹریلیا کی فتح کو آسان کر دیا۔ انہوں نے 15 گیندوں پر چار چوکوں اور دو چھکوں کی مدد سے 32 رنز بنائے اور ناٹ آؤٹ رہے۔ جبکہ اس میچ کے ہیرو جوش انگلس نے 77 گیندوں پر آٹھ چوکوں اور چار چھکوں کی مدد سے اپنی سینچری مکمل کی۔ انہوں نے 48 ویں اوور میں مارک وڈ کی گیند پر چھکا لگا کر اپنی ٹیم کو اس تاریخی فتح سے ہمکنار کرایا۔ وہ 86 گیندوں پر آٹھ چوکوں اور چھ چھکوں کی مدد سے 120 رنز بنا کر ناٹ آؤٹ رہے۔انگلینڈ کے بولرز میں سے عادل رشید اور لیام لیونگسٹون نے اچھی بولنگ کی جبکہ فاسٹ بولرز ناکام رہے۔