ایئرپورٹس پر اوورسیز پاکستانیوں کے لیے دوبارہ گرین چینل شروع کریں گے: وزیراعظم

وزیراعظم شہباز شریف نے کہا ہے کہ ایئرپورٹس پر اوورسیز پاکستانیوں کی سہولت کے لیے دوبارہ گرین چینل شروع کریں گے۔

منگل کو اوورسیز پاکستانیز گلوبل فاؤنڈیشن کی تقریب سے خطاب کرتے ہوئے ان کا کہنا تھا کہ ’گرین چینل نواز شریف کا بڑا کارنامہ تھا اور اسے دوبارہ شروع کریں گے۔ وزیر خزانہ سے کہوں گا کہ اس کے لیے آپ کے ساتھ بیٹھیں۔ گرین چینل کو چلانے میں آپ کا کردار ہو گا اور اسے ریڈ یا ییلو چینل میں نہ بدلنے دیں۔‘

انہوں نے کہا کہ ’اوورسیز پاکستانیز کی ترسیلات زر میں 30 فیصد اضافہ ہوا ہے جس کے لیے حکومت آپ کی شکر گزار ہے۔ ترسیلات زر میں اضافے سے زرمبادلہ کے ذخائر مستحکم ہوئے ہیں۔ اوورسیز پاکستانی ملک کے سفیر ہیں۔‘

شہباز شریف نے کہا ہے کہ ’آپ کی جائیدادوں کو محفوظ بنانے کے لیے اقدامات کیے جا رہے ہیں۔‘

ان کا مزید کہنا تھا کہ بیرون ملک مقیم پاکستانیوں کو ’ایمبیسڈر ایٹ لارج‘ بنایا جائے گا اور نیلا پاسپورٹ دیا جائے گا۔

’مشرق وسطیٰ اور دیگر ممالک میں ایک کروڑ پاکستانی بس رہے ہیں۔ ہم ایک کیٹیگری بنائیں گے اور دنیا کے مختلف حصوں سے ان پاکستانیوں کو ’ایمبیسڈر ایٹ لارج‘ بنائیں گے اور ان کو بلیو پاسپورٹ بھی دیں گے۔‘