اسلام آباد: آئی جی اسلام آباد نے سوشل میڈیا پر جھوٹا پراپیگنڈا کرنے کے الزام میں 11 ملزمان کو نوٹسز جاری کر دیئے۔
ذرائع کے مطابق آئی جی اسلام آباد کی جانب سے جاری کردہ نوٹسز میں جے آئی ٹی نے ملزمان کو 24 دسمبر کو طلب کر رکھا ہے۔ وفاقی حکومت نے سوشل میڈیا پر جرائم کی روک تھام کے لیے ایکٹ 2016 کے سیکشن 30 کے مطابق آئی جی اسلام آباد کے ماتحت ایک مشترکہ تحقیقاتی ٹیم کی تشکیل دی ہے۔
ذرائع کے مطابق ملزمان نے سوشل میڈیا پر جھوٹے پراپیگنڈے کے ذریعے پاکستان میں انتشار پھیلایا۔ اور جے آئی ٹی کے پاس ملزمان کے خلاف ٹھوس شواہد بھی موجود ہیں۔
جن ملزمان کو نوٹسز جاری کیے گئے ہیں ان میں صبغت اللہ ورک، محمد ارشد، عطا الرحمان، اظہر مشوانی، عروسہ ندیم شاہ، محمد علی ملک، شاہ زیب ورک، موسیٰ ورک، اکرام کٹھانہ، تقویم صدیق اور محمد نعمان افضل شامل ہیں۔
یہ بھی پڑھیں: وزیر اعظم کا ایٹمی پروگرام پر کوئی سمجھوتہ نہ کرنے کا اعلان
حکومت کی جانب سے بنائی گئی جے آئی ٹی ملزمان اور ان کے ساتھیوں کے پس پردہ مقاصد کا تعین کرنے کے لیے معاملے کی تحقیقات کر رہی ہے۔ اور مزید مجرموں کی شناخت اور ان کے خلاف قابل اطلاق قوانین کے تحت کارروائی عمل میں لائی جا رہی ہے۔
ذرائع کے مطابق جے آئی ٹی کے پاس ملزمان کے خلاف ٹھوس شواہد موجود ہیں۔