تیسرا ون ڈے: ہدف کے تعاقب میں جنوبی افریقہ کے اوپنرز پویلین لوٹ گئے

پاکستان اور جنوبی افریقہ کے درمیان تین ون ڈے میچز پر مشتمل سیریز کے تیسرے اور آخری میچ میں  جنوبی افریقہ  کی ہدف کے تعاقب میں بیٹنگ جاری ہے۔

جوہانسبرگ میں جنوبی افریقہ نے سات اوورز میں دو وکٹوں کے نقصان پر 46 رنز بنائے ہیں۔

اس سے قبل پاکستان نے پہلے بیٹنگ کرتے ہوئے مقررہ 47  اوورز میں نو وکٹوں کے نقصان پر 308 رنز بنائے تھے۔

اس سے قبل جنوبی افریقہ نے ٹاس جیت کر بولنگ کا فیصلہ کیا تھا۔ 15 تاخیر سے شروع ہونے والا میچ 3.1 اوورز کے بعد بارش کی وجہ سے روک دیا گیا تھا جس کے بعد میچ کو 47 اوورز تک محدود کر دیا گیا۔

پاکستان نے جنوبی افریقہ کی دعوت پر بیٹنگ کا آغاز کیا تو پہلی وکٹ پہلے اوور کی دوسری گیند پر ہی گر گئی۔

عبداللہ شفیق ایک مرتبہ پھر کارکردگی دکھانے میں ناکام رہے۔ وہ اس میچ میں بھی صفر پر آؤٹ ہو گئے۔ وہ سیریز کے دوران مسلسل تیسری بار صفر پر آؤٹ ہوئے۔

عبداللہ شفیق ایک ون ڈے سیریز کے تمام میچز میں صفر پر آؤٹ ہونے والے پہلے اوپنر بن گئے ہیں۔ وہ ایک سال میں بین الاقوامی میجز میں سب سے زیادہ صفر پر آؤٹ ہونے پہلے پاکستانی اوپنر بھی بن گئے ہیں۔ سنہ 2024 میں عبداللّٰہ شفیق انٹرنیشنل کرکٹ میں سات مرتبہ صفر پر آؤٹ ہوئے۔ اس سے قبل عمران نذیر سنہ 2000 میں چھ مرتبہ جبکہ محمد حفیظ سال 2012 میں چھ مرتبہ صفر پر آؤٹ ہوئے تھے۔

بابر اعظم ایک مرتبہ پھر سے فارم میں نظر آئے اور سات چوکوں کی مدد سے 52 رنز بنا کر پویلین لوٹے۔

صائم ایوب نے اپنی عمدہ کارکردگی کا سلسلہ برقرار رکھتے ہوئے ایک مرتبہ پھر سے جنوبی افریقی بولرز کو ٹف ٹائم دیا۔ صائم ایوب دو چھکوں اور 13 چوکوں کی مدد سے 101 رنز کی شاندار اننگز کھیل کر آؤٹ ہوئے۔

کپتان محمد رضوان بھی عمدہ کارکردگی کا مظاہرہ کرتے ہوئے ایک چھکے اور پانچ چوکوں کی مدد سے 53 رنز بنا کر آؤٹ ہوئے۔ سلمان علی آغا 48 جبکہ طیب طاہر نے 28 رنز بنائے۔

ان کے علاوہ شاہین شاہ شاہ آفریدی صفر، محمد حسنین چار رنز بنا کر آؤٹ ہوئے جبکہ نسیم شاہ پانچ اور سفیان مقیم صفر کے ساتھ پویلین لوٹے۔

یہاں یہ بات بھی قابلِ ذکر ہے کہ یہ میچ جنوبی افریقہ کا سالانہ پنک ڈے میچ ہے، اس دن افریقی ٹیم گلابی رنگ کی جرسی (کٹ) میں کھیلتی ہے اور اس دن کو چھاتی کے سرطان کی آگاہی کے طور پر دیکھا جاتا ہے۔

واضح رہے کہ تین ون ڈے میچز کی سیریز کے ابتدائی دو میچز جیت کر قومی ٹیم پہلے ہی سیریز میں فیصلہ کُن برتری حاصل کر چکی ہے۔

طیب طاہر، محمد حسنین، سفیان مقیم، محمد رضوان(کپتان)، صائم ایوب، عبداللہ شفیق، بابراعظم ، کامران غلام، سلمان علی آغا، شاہین آفریدی اور نسیم شاہ پاکستان کی پلیئنگ الیون میں شامل ہیں۔