پاکستان اور جنوبی افریقہ کے درمیان جاری تین ون ڈے میچز پر مشتمل سیریز کا تیسرا اور آخری میچ بارش تھمنے کے بعد دوبارہ شروع ہو گیا ہے۔
جوہانسبرگ میں پاکستان کی بیٹنگ جاری ہے۔ پاکستان نے 26 اوورز میں دو وکٹوں کے نقصان پر 128 رنز بنائے ہیں۔
صائم ایوب اور محمد رضوان کریز پر موجود ہیں۔ صائم ایوب نے 54 گیندوں پر ایک چھکے اور سات چوکوں کی مدد سے نصف سینچری بنا لی ہے۔
اس سے قبل جنوبی افریقہ نے ٹاس جیت کر بولنگ کا فیصلہ کیا تھا۔ بارش کی وجہ سے میچ کا آغاز تاخیر سے ہوا تھا تاہم دوسرا اوور گزرنے کے بعد ایک مرتبہ پھر سے بارش شروع ہو گئی جس کی وجہ سے میچ روک دیا گیا تھا۔
پاکستان کی اننگز
پاکستان نے جنوبی افریقہ کی دعوت پر بیٹنگ کا آغاز کیا تو پہلی وکٹ میچ کی دوسری گیند پر گر گئی۔
عبداللہ شفیق ایک مرتبہ پھر بہتر کارکردگی دکھانے میں ناکام رہے۔ وہ اس میچ میں بھی صفر پر آؤٹ ہو گئے۔ دورہ جنوبی افریقہ کے دوران عبداللہ شفیق مسلسل صفر پر آؤٹ ہوتے رہے ہیں۔
عبداللہ شفیق ایک ون ڈے سیریز کے تمام میچز میں صفر پر آؤٹ ہونے والے پہلے اوپنر بن گئے ہیں۔
عبداللّٰہ شفیق ایک سال میں سب سے زیادہ انٹرنیشنل ڈکس حاصل کرنے والے پاکستانی اوپنر بھی ہوگئے ہیں۔ 2024 میں عبداللّٰہ شفیق انٹرنیشنل کرکٹ میں 7 مرتبہ صفر پر آؤٹ ہوئے۔ اس سے قبل عمران نذیر سمہ 2000 میں 6 مرتبہ جبکہ محمد حفیظ سال 2012 میں 6 مرتبہ صفر پر آؤٹ ہوئے تھے۔
دوسری جانب پاکستان نے جنوبی افریقہ کے خلاف تیسرے اور آخری ون ڈے میچ کےلیے پلیئنگ الیون کا اعلان کرتے ہوئے ٹیم میں 3 تبدیلیاں کی ہیں۔
طیب طاہر، محمد حسنین اور سفیان مقیم کو پلیئنگ الیون کا حصہ بنایا گیا ہے جبکہ عرفان نیازی، حارث رؤف اور ابرار احمد کو آرام دیا گیا ہے۔
اس کے علاوہ ٹیم میں کپتان محمد رضوان، صائم ایوب، عبداللہ شفیق، بابراعظم ، کامران غلام، سلمان علی آغا، شاہین آفریدی اور نسیم شاہ شامل ہیں۔
یہاں یہ بات بھی قابلِ ذکر ہے کہ یہ میچ جنوبی افریقہ کا سالانہ پنک ڈے میچ ہے، اس دن افریقی ٹیم گلابی رنگ کی جرسی (کٹ) میں کھیلتی ہے اور اس دن کو چھاتی کے سرطان کی آگاہی کے طور پر دیکھا جاتا ہے۔
واضح رہے کہ 3 ون ڈے میچز کی سیریز کے ابتدائی 2 میچز جیت کر قومی ٹیم پہلے ہی سیریز میں فیصلہ کُن برتری حاصل کر چکی ہے۔