’چیمپیئنز ٹرافی کے انعقاد پر اصولی مؤقف دل کی آواز‘، محسن نقوی کی وزیراعظم سے ملاقات

پاکستان کرکٹ بورڈ کے چیئرمین محسن نقوی نے وزیراعظم شہباز شریف سے ملاقات میں چیمپیئنز ٹرافی ٹورنامنٹ کی پیشرفت کے حوالے سے آگاہ کیا ہے۔

اتوار کی صبح وزیراعظم کے دفتر سے جاری کیے گئے بیان کے مطابق وزیراعظم شہباز شریف سے وفاقی وزیر داخلہ و چیئرمین پاکستان کرکٹ بورڈ محسن نقوی نے ملاقات کی ہے۔

بیان میں کہا گیا ہے کہ چئیرمین پی سی بی محسن نقوی نے وزیراعظم کو آئی سی سی چیمپیئنز ٹرافی ٹورنامنٹ کی پیشرفت کے حوالے سے آگاہ کیا۔

پرائم منسٹر آفس کے مطابق وزیراعظم شہباز شریف نے چیمپیئنز ٹرافی سے متعلق چیئرمین پی سی بی محسن نقوی کے اصولی موقف کو سراہا اور چیمپیئنز ٹرافی ٹورنامنٹ کے حوالے سے کرکٹ بورڈ کے چیئرمین کے اقدامات پر مکمل اعتماد کا اظہار کیا۔

وزیراعظم نے اس موقع پر کہا کہ ’چیمپیئنز ٹرافی ٹورنامنٹ سے متعلق آپ کا موقف ہر پاکستانی کے دل کی آواز ہے۔‘

بیان کے مطابق وزیراعظم نے محسن نقوی سے کہا کہ ’آئی سی سی میں آپ نے پاکستان کے 24 کروڑ عوام کی ترجمانی کی۔ پاکستان کی عزت سب سے پہلے ہے اور اس کے بعد کچھ اور ہے۔‘

کرکٹ بورڈ کے چیئرمین محسن نقوی نے وزیراعظم کو بتایا کہ پی سی بی پاکستان میں چیمپئنز ٹرافی ٹورنامنٹ کے انعقاد کے لیے مکمل طور پر تیار ہے۔