انڈیا کے مشہور ریپر بادشاہ کی کچھ عرصے سے پاکستانی اداکارہ ہانیہ عامر کے ساتھ رومانوی تعلق کی خبریں زیرِگردش ہیں۔حال ہی میں ہانیہ عامر، بادشاہ کے کنسرٹ میں بھی گئیں اور انہوں نے اس ایونٹ کا کلپ بھی اپنے انسٹاگرام اکاؤنٹ پر پوسٹ کیا۔تاہم ہندوستان ٹائمز کے مطابق بادشاہ نے ساہتیہ آج تک 2024 میں ان افواہوں کی تردید کرتے ہوئے کہا کہ ہانیہ ’ان کی بہت اچھی دوست‘ ہیں جن کے ساتھ ان کا ’اچھا تعلق‘ ہے۔
ان کا کہنا تھا کہ ’ہم جب بھی ملتے ہیں تو خوب ہلہ گلہ کرتے ہیں اور بس اتنا ہی ہوتا ہے۔ وہ اپنی زندگی میں خوش ہے اور میں اپنی زندگی میں۔ ہماری ہم آہنگی شاندار ہے، لیکن لوگ اکثر اس کی غلط تشریح کرتے ہیں اور وہ دیکھتے ہیں جو وہ ماننا چاہتے ہیں۔‘
بادشاہ اور ہانیہ جب بھی ملتے ہیں اکثر انسٹاگرام پر تصاویر اور ویڈیوز شیئر کرتے ہیں، خاص طور پر دبئی میں۔ہانیہ عامر کی جانب سے شیئر کیے گئے نئے کلپ میں، وہ اور بادشاہ ایک دوسرے کے سامنے جھکتے ہیں اور بادشاہ ہاتھ جوڑتے ہیں۔ اس کے بعد ہانیہ ریپر کو آواز دیتی ہیں، جس کے بعد وہ انہیں گلے لگاتے ہیں۔اس موقع پر ہانیہ کہتی ہیں کہ ’یہ میرا خوبصورت دوست ہے! جو ایک مکمل راک سٹار ہے! ہیرو ہے۔‘بادشاہ نے اس ویڈیو کو اپنے انسٹاگرام اکاؤنٹ پر ری شیئر کرتے ہوئے لکھا کہ ’سب کو پتہ ہے کہ راک سٹار کون ہیں۔‘