راولپنڈی ٹیسٹ میچ میں پاکستان نے انگلینڈ کو 9 وکٹوں سے شکست دے دی۔
واضح رہے کہ راولپنڈی ٹیسٹ میچ میں تیسرے دن انگلینڈ کی پوری ٹیم 112 رنز بنا کر آئوٹ ہو گئی، پاکستان کو جیتنے کیلئے 36 رنز کا ہدف مل گیا۔
دوسرے روز کھیل کے اختتام پر انگلینڈ نے اپنی دوسری اننگز میں 3وکٹوں کے نقصان پر24رنز بنائے تھے۔دوسری اننگز میں انگلینڈ کے کھلاڑی بین ڈکٹ 12 رنز،زیک کرالی دو رنز اوراولی پوپ صرف ایک رن بنا کرآوٹ ہوئے۔
کھیل کے دوسرے دن پاکستان کی جانب سے نعمان علی نے دو جبکہ ساجد خان نے ایک وکٹ حاصل کی تھیں۔
دل تو کرتا ہے ہر دن سنچری کی جائے لیکن ایسا ہوتا نہیں، سعود شکیل
راولپنڈی ٹیسٹ میچ میں انگلینڈ کی جانب سے تیسرے دن کے کھیل کا آغاز جوروٹ اور ہیری بروک نے کیا۔ ہیری بروک 26 رنز بنا کر نعمان علی کی گیند پر محمد رضوان کے ہاتھوں کیچ آئوٹ ہوئے۔
ان کے بعد آنے والے بین اسٹوکس بھی نعمان علی کا شکار بنے اس طرح انگلینڈ کی پانچویں وکٹ 70 کے مجموعی اسکور پر گری۔ جیمی اسمتھ نے تین رنز بنائے تھے کہ ساجد خان کی گیند پر بولڈ ہو گئے۔
انگلینڈ کی ساتویں وکٹ جوروٹ کی گری انہوں نے 33 رنز بنائے، ان کا نعمان علی کی گیند پر محمد رضوان نے کیچ تھاما۔ انگلینڈ کی آٹھویں وکٹ 97 رنز پر گری۔
راولپنڈی ٹیسٹ میں انگلینڈ کی نویں وکٹ 106 کے اسکور پر گری، ریحان احمد کو ساجد خان نے بولڈ کیا، انہوں نے سات رنز بنائے۔
انگلینڈ کی پوری ٹیم دوسری اننگز میں 112 رنز بنا کر آئوٹ ہو گئی، اس طرح پاکستان کو انگلینڈ نے جیتنے کے لئے 36 رنز کا ٹارگٹ دیاتھا۔
پاکستان کی جانب سے دوسری اننگز میں نعمان نے چھ جبکہ ساجد خان نے چار کھلاڑیوں کو آئوٹ کیا۔ نعمان علی کی میچ میں مجموعی طور پر 9 وکٹیں جبکہ ساجد خان نے میچ میں مجموعی طور پر10 وکٹیں حاصل کیں۔
پاکستان نے مطلوبہ ہدف ایک وکٹ کے نقصان پر پورا کر لیا، پاکستان کے واحد کھلاڑی صائم ایوب اٹھ رنز بنا کر جیک لیچ کی گیند پر ایل بی ڈبلیو آئوٹ ہوئے۔ عبداللہ شفیق 5 اور شان مسعود 23 رنز کے ساتھ ناٹ آئوٹ رہے۔ پاکستان نے تیسرا ٹیسٹ میچ جیت کر ٹیسٹ سیریز بھی اپنے نام کر لی۔
پاکستان نے انگلینڈ کو9 سال بعد ٹیسٹ سیریز میں شکست دی، پاکستان نے آخری بار 2016 میں انگلینڈ کو سیریز میں شکست دی تھی، اس کے علاوہ ہوم سیریز میں پاکستان کو چار سال بعد فتح حاصل ہوئی۔