کراچی کے ساحلی علاقوں میں سمندری طوفان کے خدشے کے پیشِ نظر سمندر میں نہانے، تیراکی اور غوطہ خوری پر پابندی لگا دی گئی ہے۔
کمشنر کراچی سید حسن نقوی کی جانب سے جاری کردہ نوٹیفکیشن میں کہا گیا ہے کہ ساحلی علاقوں میں سمندر میں نہانے، تیراکی یا غوطہ خوری کرنے پر پابندی عائد کی گئی ہے۔
نوٹیفیکیشن میں بتایا گیا ہے کہ دفعہ 144 کے تحت ماہی گیروں کے سمندر میں جانے پر بھی 31 اگست تک پابندی عائد کر دی گئی ہے۔
نیشنل ایمرجنسی آپریشن سینٹر کا سمندری طوفان کاالرٹ جاری
خیال رہے کہ کراچی سمیت سندھ کے بیشتر شہر مون سون سسٹم کی لپیٹ میں ہے۔ محکمہ موسمیات نے آج رات یا صبح تک سندھ کی ساحلی پٹی میں سمندری طوفان بننے کا خطرہ ظاہر کیا ہے جبکہ سمندری طوفان کا ہائی الرٹ بھی جاری کر دیا گیا ہے۔
محکمہ موسمیات کے مطابق سسٹم کے زیر اثر کراچی سمیت سندھ کے دیگر اضلاع میں موسلادھار بارش کا امکان ہے۔