سٹٹ گارٹ۔12جون (اے پی پی):برطانوی ٹینس سٹار اینڈی مرے سٹٹ گارٹ اوپن ٹینس ٹورنامنٹ میں مردوں کے سنگلز مقابلوں کے ابتدائی رائونڈ میں ہار کر ایونٹ سے باہر ہوگئے،امریکا کے مارکوس اینڈریس گیرون نے عمدہ کھیل پیش کرتے ہوئے 37 سالہ برطانوی ٹینس سٹار کو مینز سنگلز مقابلوں کے ابتدائی رائونڈ میں 0-2 سیٹس سے شکست دی ۔اے ٹی پی سٹٹ گارٹ اوپن ٹینس کے دلچسپ اور کانٹے دار مقابلوں کا سلسلہ جرمنی میں شروع ہوگیا ہے جس میں شائقین کو زبردست مقابلے دیکھنے کو ملیں گے۔ ٹورنامنٹ میں کھیلے گئے مینز سنگلز مقابلوں کے ابتدائی رائونڈ میں امریکا کے مارکوس اینڈریس گیرون نے شاندار کارکردگی کا مظاہرہ کرتے ہوئے انگلینڈ کے نامور ٹینس سٹار اور سابق عالمی چیمپئن اینڈی مرے کوسٹریٹ سیٹس میں 3-6 اور 4-6سے ہرا کر نہ صرف ٹورنامٹ سے باہر کر دیا بلکہ ایونٹ کا فاتحانہ آغاز کرتے ہوئے دوسرے رائونڈ کے لئے بھی کوالیفائی کرلیا۔اپنے کیریئر کے 999 ویں مینز سنگلز میچ میں نظر آنے والے اور تین بار کے گرینڈ سلام چیمپئن اینڈی مرے کو امریکی مارکوس گیرون کے ہاتھوں سٹریٹ سیٹس میں شکست کا سامنا کرنا پڑا ۔اینڈی مرے آئندہ ہفتے کوئینز ٹینس ٹورنامنٹ میں کھیلنے کی امید رکھتے ہیں کیونکہ رواں سال کے تیسرے گرینڈ سلام ومبلڈن اوپن ٹینس ٹورنامنٹ کے لیے ان کی تیاریاں جاری ہیں،اس کے علاوہ وہ آل انگلینڈ کلب میں مینز ڈبلز مقابلوں میں بھائی جمی مرے کے ساتھ بھی ٹیم بنائیں گے جس میں جوڑی کے طور پر ان کی پہلی گرینڈ سلام ایونٹ میں شرکت ہوگی۔واضح رہے کہ رواں سال کے تیسرا بڑا گرینڈ سلام ومبلڈن اوپن ٹینس ٹورنامنٹ یکم جولائی سے شروع ہوگا۔