مارشل گرانولرز اور ہوراشیو فرنچ اوپن ٹینس مینز ڈبلز کے سیمی فائنل رائونڈ میں داخل

پیرس۔6جون (اے پی پی):ہسپانوی ٹینس سٹار مارشل گرانولرز اور ان کے ارجنٹائن کے جوڑی دار ہوراشیو زیبالوس پر مشتمل ٹاپ سیڈڈ جوڑی اپنی فتوحات کے تسلسل کو برقرار رکھتے ہوئے فرنچ اوپن ٹینس ٹورنامنٹ کے مینز ڈبلز مقابلوں کے سیمی فائنل رائونڈ میں پہنچ گئی ۔انہوں نے مردوں کے ڈبلز مقابلوں کے کوارٹر فائنل رائونڈ میں جمہوریہ چیک کے ٹوماش مخاچ اور ان کے چین کے جوڑی دار ژانگ زیزن کو شکست دی۔ سال کے دوسرا گرینڈ سلام فرنچ اوپن ٹینس ٹورنامنٹ کے دلچسپ اور کانٹے دار مقابلوں کا سلسلہ فرانس کے دارلحکومت پیرس میں جاری ہے ۔

مینز ڈبلز مقابلوں کے کوارٹر فائنل میچ میں ہسپانوی ٹینس سٹار مارشل گرانولرز اور ان کے ارجنٹائن کے جوڑی دار ہوراشیو زیبالوس پر مشتمل ٹاپ سیڈڈ جوڑی نے شاندار کارکردگی کا مظاہرہ کرتے ہوئے حریف جمہوریہ چیک کے ٹوماش مخاچ اور ان کے چین کے جوڑی دار ژانگ زیزن کو سٹریٹ سیٹس میں 4-6 اور 1-6 سے شکست دے کر میگا ایونٹ کے سیمی فائنل رائونڈ کے لئے کوالیفائی کرلیا۔