سعودی عرب ، میڈیکل ٹیم نے 70 سالہ چینی عازم خاتون کی جان بچالی

ریاض ۔3جون (اے پی پی):سعودی عرب میں مکہ ہیلتھ سینٹر کے تحت کنگ عبداللہ میڈیکل سٹی کے ہارٹ ہیلتھ سینٹر کی سپیشلسٹ میڈیکل ٹیم دل کے عارضے میں مبتلا 70 سالہ چینی عازم خاتون کی جان بچانے میں کامیاب رہی۔ایس پی اےکے مطابق چینی خاتون کو دائمی عارضہ قلب کے باعث سانس لینے میں دشواری، خون میں آکسیجن کی سطح میں تیزی سے کمی اور دل کے پٹھوں کی خرابی پر ایمرجنسی میں داخل کیا گیا تھا۔

میڈیکل سٹی میں کارڈیک کیتھرائزیشن ٹیم نے دل کے ایک والوو کا کامیاب آپریشن کیا۔ اب چینی عازم خاتون کی صحت تسلی بخش ہے ۔واضح رہے میڈیکل سٹی میں کارڈیک کیتھرائزیشن ٹیم نے اس سے قبل بھی اس طرح کے آپریشن کئے ہیں جس کے لیے اعلی تربیت، قابلیت اور مہارت کی ضرورت ہوتی ہے۔