آصف علی زرداری تمام سیاسی جماعتوں کو ساتھ لیکر چلنے کے حق میں ہے،وزیر اعلی بلوچستان میر سرفراز بگٹی

کوئٹہ۔ 08 مارچ (اے پی پی):وزیر اعلی بلوچستان میر سرفراز بگٹی نے کہا ہے کہ آصف علی زرداری مفاہمت کے بادشاہ ہے وہ تمام سیاسی جماعتوں کو ساتھ لیکر چلنے کے حق میں ہے ،بلوچستان کابینہ سینیٹ کے ضمنی انتخابات کے بعد تشکیل دیاجا ئے گا۔

ان خیالات کا اظہار انہوں نے بلوچستان اسمبلی کے باہر میڈیا سے بات چیت کرتے ہوئے کیا ، میر سرفراز بگٹی نے کہا کہ صدارتی انتخابات کے لئے پاکستان پیپلز پارٹی تمام جماعتوں سے بات کریگی اس سلسلے میں جمعیت علماءاسلام کے قائد مولانا فضل الرحمن اور صوبائی قائدین سے صدارتی انتخابات میں ساتھ دینے پر بات ہو ئی ہے۔

انہوں نے کہا کہ ضمنی انتخابات کے بعد صوبائی کابینہ کا انتخا ب عمل میں لایا جا ئے گا ،پاکستان پیپلزپارٹی اور پاکستان مسلم لیگ ن کے درمیان حکومت سازی کے حوالے سے قائم کمیٹی وزارتوں کا فیصلہ کریگی۔ انہوں نے موروثی سیاست کے حوالے سے پوچھے گئے سوال کے جواب میں کہا کہ میں وزیر اعلی ہوں میرے والد وزیر اعلی نہیں تھے۔