سعودی عرب کے دوطیارے غزہ کےلیے امدادی سامان لے کر العریش ایئرپورٹ پہنچ گئے

ریاض۔25فروری (اے پی پی):سعودی عرب کے دوطیارے غزہ کےلیے امدادی سامان لے کر العریش ایئرپورٹ پہنچ گئے۔سرکاری خبررساں ادارے ’ایس پی اے‘کے مطابق شاہ سلمان امدادی مرکز کی جانب سے دوطیارے غزہ کےلیے امدادی سامان لے کر مصر کےالعریش ایئرپورٹ پہنچ گئے ہیں۔

دونوں طیاروں میں مصری ہلال احمر کو فراہم کی جانے والی دو ٹرانسپورٹ گاڑیاں اور دو فورک لفٹس ہیں۔مذکورہ امداد سے غزہ کےلیے العریش ایئرپورٹ پہنچنے والے امدادی سامان کی منتقلی کے عمل کو آسان بنانے میں مدد ملے گی۔

واضح رہے شاہ سلمان امدادی مرکز کی جانب سے غزہ پٹی کے فلسطینی بھائیوں کی مدد کے لیے فضائی اور سمندری راستے سے امدادی مہم جاری ہے۔ اب تک 40 طیارے امدادی سامان لے کر العریش ائیرپورٹ پہنچ چکے ہیں۔