شادی پر بیٹی کو جہیز اور مہمانوں کو تحائف دینا عام سی بات سمجھی جاتی ہے اور شادیوں پر اکثر نت نئی چیزیں دیکھنے کو ملتی ہیں تاہم بھارت میں ایک شادی میں باپ نے مہمانوں میں ہیلمٹ تقسیم کرکے سب کو حیران کردیا ہے۔
بھارتی ریاست چھتیس گڑھ سے تعلق رکھنے والے یادیو نامی شخص نے بیٹی کی شادی پر 60 کے قریب ہیلمٹ مہمانوں کو روڈ سیفٹی کے حوالے سے آگاہی فراہم کرنے کے لیے مہمانوں کو ہیلمٹ کا تحفہ دیا، یادیو کی فیملی نے ہیلمٹ پہن کر شادی میں ڈانس بھی کیا۔
یادیو نے اس حوالے سے کہا کہ میں نے اپنی بیٹی کی شادی کو روڈ سیفٹی کے حوالے سے آگاہی دینے کا بہترین موقع تصور کیا، اس دوران میں نے مہمانوں کو بتایا ہے کہ زندگی بہت قیمتی ہے۔ہم نے تحفے کے ساتھ ساتھ مہمانوں سے گزارش کی ہے کہ گاڑی چلاتے وقت نشے میں نہ رہیں کیونکہ حادثات کی بڑی وجہ یہ بھی ہے۔
واضح رہے کہ ہر سال ٹریفک حادثات میں ہونیوالی اموات کی تعداد دہشت گردی میں مرنے والوں سے بھی زیادہ ریکارڈ کی جاتی ہے تاہم اس کے باوجود موٹرئیکل سوار ہیلمٹ کا استعمال کم ہی کرتے ہیں۔
بھارتی شخص کی طرف سے شادی میں آئے مہمانوں میں ہیلمٹ کی تقسیم ی خبر نے پوری دنیا کے میڈیا میں جگہ بنائی اور سوشل میڈیا پر بھی اس خبر کے چرچے ہیں جس پر سوشل میڈیا صارفین نے اس اقدام کو بھرپور سراہا ہے۔