دنیا کی کوئی طاقت صاف شفاف انتخابات سے نہیں روک سکتی، نگران وزیر داخلہ

نگران وفاقی وزیر داخلہ گوہر اعجاز نے کہا ہے کہ انتخابات کے دوران ہمیں خطرہ صرف ان عناصر سے ہے جو ملک کو عدم استحکام کا شکار کرنا چاہتے ہیں۔

اسلام آباد میں میڈیا سے گفتگو کرتے ہوئے انہوں نے عام انتخابات 2024 کی سیکیورٹی کے حوالے سے گفتگو کی۔ انہوں نے کہا کہ 48 گھنٹے کے اندر الیکشن کاانعقاد ہونے جارہا ہے، پوری کوشش ہوگی کہ پُرامن انتخابات ہوں۔

گوہر اعجاز کا کہنا تھا کہ انتظامیہ، پولیس اور متعلقہ ادارے پُرامن انتخابات کرانے کیلئے پرعزم ہیں۔ ہماری کوشش ہوگی کہ مکمل سیکیورٹی فراہم کی جائے، ووٹ دینا آپ کا حق ہے،آزادی سے ووٹ دیں۔

الیکشن 2024: وقت کم مقابلہ سخت، انتخابی مہم کا آج آخری روز

نگران وفاقی وزیر نے کہا کہ بلوچستان واقعات پر افسوس ہے، باجوڑ واقعے پر حیران تھے کہ یہ کیوں ہوا؟ الیکشن کے دوران کسی کو قانون کو ہاتھ میں لینے کی اجازت نہیں ہوگی۔

انہوں نے مزید کہا کہ 2018 کے انتخابات میں 666 افراد کی جانیں گئی تھیں، اس مرتبہ ایسا الیکشن دیں گے جس میں کسی کی جان و مال کو کوئی خطرہ نہ ہو۔ دنیا کی کوئی طاقت صاف شفاف انتخابات سے نہیں روک سکتی.