برطانیہ کے بادشاہ چارلس سوم کینسر کا شکار ہوگئے، شاہی محل بکنگھم پیلس نے شاہ چارلس کے مرض اورعلاج کی تصدیق کردی، بادشاہ کے سنگین بیماری میں مبتلا ہونے کی وجہ سے شاہی خاندان میں تہلکہ مچ گیا۔
میڈیا رپورٹ کے مطابق شاہی محل کی جانب سے بتایا گیا ہے کہ شاہ چارلس کو کینسر کی تشخیص پروسٹیٹ کے علاج کے دوران ہوئی تاہم یہ نہیں بتایا گیا کہ بادشاہ میں کس قسم کے کینسر کی تشخیص ہوئی ہے۔
شاہ چارلس کو علاج کی وجہ سے عوامی فرائض ملتوی کرنے کا مشورہ دیا گیا ہے اور دورانِ علاج ملکہ کمیلا، ولی عہد شہزادہ ولیم ان کی جگہ ذمہ داریاں ادا کریں گے تاہم بادشاہ ہفتہ وار شیڈول کے تحت وزیر اعظم رشی سنک سے ملتے رہیں گے۔
یاد رہے کہ گزشتہ ماہ شاہ چارلس پروسٹیٹ کے آپریشن کے لیے اسپتال میں داخل ہوئے تھے جہاں ان کا کامیاب آپریشن کیا گیا۔
نیشنل ہیلتھ سروس کے مطابق عمر رسیدہ افراد میں پروسٹیٹ کا بڑھ جانا معمول کی بیماری ہے، شاہ چارلس کوگزشتہ ٹیسٹ کے دوران پروسٹیٹ بڑھ جانے کا انکشاف ہوا تھا جبکہ پروسٹیٹ کے علاج کے دوران کینسر کی تشخیص ہوئی ہے۔