الیکشن کمیشن نے ڈپٹی کمشنر اور انسپکٹر جنرل پولیس اسلام آباد کے تبادلے کے احکامات پر عمل نہ کرنے پر سیکرٹری اسٹیبلشمنٹ ڈویژن کو 26دسمبر کو طلب کر لیا

اسلام آباد۔24دسمبر (اے پی پی):الیکشن کمیشن نے ڈپٹی کمشنر اور انسپکٹر جنرل پولیس اسلام آباد کے تبادلے کے احکامات پر عمل نہ کرنے پر سیکرٹری اسٹیبلشمنٹ ڈویژن کو 26دسمبر کو طلب کر لیا ۔ سیکرٹری الیکشن کمیشن کی جانب سے سیکرٹری اسٹیبلشمنٹ ڈویژن کو خط ارسال کیا گیا ہے جس میں کہا گیا ہے کہ صاف ، شفاف ، آزادانہ ، منصفانہ اور غیر جانبدارانہ انتخابات کا انعقاد الیکشن کمیشن کی آئینی ذمہ داری ہے ۔

الیکشن کمیشن نے 17اگست کو ڈپٹی کمشنر اسلام آباد اور آئی جی اسلام آباد کے تبادلے کے احکامات دیئے تھے تاہم تاحال ان احکامات پر عملدرآمد نہیں ہو سکا۔ خط میں کہا گیا ہے کہ اس ضمن میں الیکشن کمیشن نے سماعت کے لئے 26دسمبر کا دن مقرر کرتے ہوئے سیکرٹری اسٹیبلشمنٹ ڈویژن کو ذاتی حیثیت میں پیش ہونے کی ہدایت کی ہے ۔