آئی سی سی کرکٹ ورلڈ کپ کے 21 ویں میچ میں نیوزی لینڈ کی جانب سے دیے گئے 274 رنز کے ہدف کے جواب میں انڈیا کی بیٹنگ جاری ہے۔انڈیا نے اب سے کچھ دیر پہلے تک تین وکٹوں کے نقصان پر 21.3 اوورز میں 128 رنز بنا لیے تھے۔اس سے قبل نیوزی لینڈ کی پوری ٹیم پہلے بیٹنگ کرتے ہوئے مقررہ 50 اوورز میں 273 کے سکور پر آؤٹ ہوگئی۔نیوزی لینڈ کی جانب سے ڈیرل مچل 130 رنز بنا کر نمایاں رہے جبکہ رَچن رویندرا نے 75 اور گلین فلپس نے 23 رنز سکور کیے۔انڈیا کی جانب سے محمد شامی نے پانچ وکٹیں حاصل کیں جبکہ اُن کے علاوہ کلدیپ یادو نے دو اور جسپریت بمراہ نے ایک کھلاڑی کو آؤٹ کیا۔دھرم شالہ میں کھیلے جا رہے میچ میں انڈیا نے ٹاس جیت کر پہلے فیلڈنگ کا فیصلہ کیا۔یہ میچ دونوں ٹیموں کا میگا ایونٹ میں پانچواں میچ ہے۔دونوں ٹیمیں ابھی تک اس ورلڈ کپ میں چار چار میچ کھیل چکی ہیں جس میں انہیں کسی بھی میچ میں شکست نہیں ہوئی۔اگر ورلڈ کپ کے پوائنٹس ٹیبل پر نگاہ ڈالی جائے تو دونوں ٹیموں کے 8،8 پوائنٹس ہیں تاہم بہتر نیٹ رن ریٹ کے باعث نیوزی لینڈ پہلے جبکہ انڈیا دوسرے نمبر پر موجود ہے۔ اس میچ کے لیے نیوزی لینڈ کو انجری کے شکار کپتان کین ولیمسن کی خدمات میسر نہیں ہیں جبکہ دوسری جانب انڈین آل راؤنڈر ہاردک پانڈیا بھی بنگلہ دیش کے خلاف پونے میں کھیلے گئے میچ میں زخمی ہونے کے باعث اس میچ میں شرکت نہیں کر رہے۔نیوزی لینڈ کے خلاف بولنگ کرتے ہوئے محمد شامی نے پانچ کھلاڑیوں کو پویلین کی راہ دکھائی۔ (فوٹو: اے ایف پی)اگر نیوزی لینڈ اور انڈیا کے درمیان ون ڈے ورلڈ کپ میں میچوں کی تاریخ کو دیکھا جائے تو دونوں ٹیمیں اب تک 9 مرتبہ ایک دوسرے کے آمنے سامنے آ چکی ہیں جس میں پانچ مرتبہ کامیابی نیوزی لینڈ جبکہ تین مرتبہ جیت انڈیا کو ہوئی اور ایک میچ بے نتیجہ رہا۔انڈیا اور نیوزی لینڈ کے درمیان آخری مرتبہ آئی سی سی ون ڈے ورلڈ کپ کا میچ 2019 میں کھیلا گیا تھا جس میں سیمی فائنل میں کیویز نے ٹیم انڈیا کو شکست دے دی تھی۔انڈیا کی پلئینگ الیونانڈین ٹیم میں روہت شرما(کپتان)، شبھمن گِل، وراٹ کوہلی، شریاس ایئر، کے ایل راہُل (وکٹ کیپر)، سوریا کمار یادو، رویندرا جڈیجہ، جسپریت بمراہ، کلدیپ یادو، محمد شامی اور محمد سراج شامل ہیں۔نیوزی لینڈ کی پلئینگ الیوننیوزی لینڈ کی ٹیم میں ڈیوون کونوے، وِل ینگ، رَچن رویندرا، ڈیرل مِچل، ٹام لیتھم (کپتان، وکٹ کیپر)، گلین فلپس، مارک چیپ مین، مِچل سینٹنر، میٹ ہینری، لوکی فرگوسن اور ٹرینٹ بولٹ شامل ہیں۔