انڈیا میں جاری ورلڈ کپ کے 14 ویں میچ میں آسٹریلیا نے سری لنکا کو پانچ وکٹوں سے شکست دے دی ہے۔پیر کو لکھنؤ میں سری لنکا نے ٹاس جیت کر آسٹریلیا کے خلاف پہلے بیٹنگ کرتے ہوئے 209 رنز بنائے تھے۔آسٹریلیا کی جانب سے 210 رنز کے تعاقب میں مچل مارش اور جوش انگلس نے نصف سینچریاں سکور کرکے اپنی ٹیم کی جیت میں اہم کردار ادا کیا۔ ان کے علاوہ مارنس لبوشین نے 40 اور گلین میکس ویل نے 31 رنز بنائے۔سری لنکا کے اوپنرز پتھم نسانکا نے 67 گیندوں پر 61 اور کوشل پریرا نے 82 گیندوں پر 78 رنز بناکر اپنی ٹیم کو ایک اچھا سٹارٹ دیا لیکن ان کے علاوہ کوئی بھی بیٹر آسٹریلوی بولرز کے سامنے مزاحمت نہیں کرسکا۔سری لنکا کے آٹھ کھلاڑی دس کے ہندسے تک بھی نہیں پہنچ سکے اور اس طرح پوری ٹیم صرف 44 ویں اوور میں آؤٹ ہو کر پویلین واپس لوٹ گئی۔سری لنکا کی جانب سے دلشان مدھو شانکا نے تین وکٹیں حاصل کیں۔آسٹریلیا کی جانب سے سپنر ایڈم زمپا نے آٹھ اوورز میں 47 رنز دے کر چار وکٹیں حاصل کیں اور ’پلیئر آف دا میچ‘ قرار پائے۔ ان کے علاوہ مچل سٹارک اور پیٹ کمنز نے دو، دو وکٹیں حاصل کیں جبکہ گلین میکس ویل کے حصے میں ایک وکٹ آئی۔ خیال رہے آسٹریلیا اس ورلڈ کپ میں اب تک تین میچ کھیل چکی ہے اور سری لنکا کے خلاف فتح اس ٹورنامنٹ میں ان کی پہلی جیت ہے۔آسٹریلیا کی ٹیم 20 اکتوبر کو اپنا اگلا میچ پاکستان کے خلاف بنگلور میں کھیلے گی۔