پشاور ہائی کورٹ کا شادی کی بنیاد پر افغان شہری کو شہریت دینے کا فیصلہ

پاکستانی شہری زینت بیگم اور ان کے افغان شوہر نے عدالت سے رجوع کیا تھا کہ وزارت داخلہ ان کی درخواست برائے شہریت تسلیم نہیں کر رہی اور ان کی درخواست کو بغیر دیکھے اور سُنے رد کر دیا۔

ان کے وکیل سیف اللہ محب کاکاخیل نے عدالت میں اپنے دلائل کے دوران بتایا کہ ان کے موکِل کی شادی کافی عرصہ پہلے ہوئی تھی اور ان کی شادی سے بچے بھی ہیں۔

اس شادی کی وجہ سے ان کے بچوں کو بھی مشکلات کا سامنا ہے جس کی وجہ سے ان کے فارم ب وغیر بھی نہیں بن رہے۔

انہوں نے بتایا کہ شادی کے بنیاد پر وفاقی شرعی عدالت تک کا فیصلہ آگیا ہے، لیکن قانون میں تبدیلی نہیں کی گئی۔ نہ تو درخواست لی جاتی ہے اور نہ ہی متعلقہ محکمے شنوائی کرتے ہیں۔ اس وجہ سے لوگ عدالت کا رُخ کرتے ہیں۔

پشاور ہائی کورٹ کے جسٹس عبدالشکُور اور جسٹس سید ارشد علی نے وزارتِ داخلہ کو احکامات جاری کیے کہ شادی کی بنیاد پر شوہر کو شہریت دے اور زینت بیگم کے شوہر وزارتِ داخلہ میں اپنی درخواست جمع کروائیں۔

عدالت نے یہ حکم بھی جاری کیا کہ زینت بیگم کے شوہر کی درخواست کو جلد سے جلد نمٹایا جائے۔