حال ہی میں خبر سامنے آئی کہ وہ چھوٹا ہتھیار جسے مراٹھا کے جنگجو شیواجی نے سنہ 1659 میں استعمال کیا تھا، نومبر میں لندن سے انڈیا واپس لایا جائے گا۔ لوہے سے بنے ’واگھ ناخ‘ کی شکل شیر کے پنجے جیسی ہے۔
یہ ہتھیار شیواجی نے بیجاپور سلطنت کے جنرل افضل خان کو قتل کرنے کے لیے استعمال کیا تھا۔
یہ ہتھیار اس وقت لندن کے ’وکٹوریہ اینڈ البرٹ میوزیم‘ میں رکھا گیا ہے۔ اسے انڈیا لائے جانے کے بعد ممبئی کے چھترپتی شیواجی مہاراج واستو میوزیم میں رکھا جائے گا۔
وکٹوریہ اینڈ البرٹ میوزیم کی دستاویزات میں بتایا گیا ہے کہ یہ ہتھیار ایسٹ انڈیا کمپنی کے ایک افسر جیمز گرانٹ ڈف کا تھا، جسے مراٹھوں کے پیشوا کے وزیراعظم نے تحفے میں دیا تھا۔
Getty Images
افضل خان کا اصل نام عبداللہ بھٹاری تھا۔ وہ طویل قد کے مالک تھے اور کئی بڑی لڑائیاں لڑنے کا تجربہ رکھتے تھے۔
سنہ 1656 کے بعد انھیں بیجاپور پر اورنگزیب کی فوج کے حملوں سے نمٹنے کی ذمہ داری دی گئی اور انھوں نے اس مشن کو کامیابی سے نبھایا۔
بیجاپور کے نئے نواب علی عادل شاہ اور ملکہ بیگم بڑی صاحبہ تمام بڑے کاموں کی ذمہ داری افضل خان کو سونپتی تھیں۔
محمد عادل شاہ کی حکومت پر لکھی گئی کتاب ’محمد نامہ‘ میں اس بات کا ذکر ہے کہ کس طرح افضل خان نے سیرت کے بادشاہ کستوری رنگا کو امن معاہدے پر دستخط کرنے کے بہانے اپنے کیمپ میں بلایا اور ان کا قتل کیا۔
جادوناتھ سرکار اپنی کتاب ’شیواجی اینڈ ہز ٹائمز‘ میں لکھتے ہیں کہ ’جب محمد عادل شاہ کی موت کے بعد بیجاپور ریاست میں اقتدار کی کشمکش شروع ہوئی تو بڑی بیگم صاحبہ کے حکم پر یکے بعد دیگرے تین سینئر جرنیلوں کو قتل کر دیا گیا۔‘ ان میں سے کم از کم ایک خان محمد کے قتل میں افضل خان کا ہاتھ تھا۔
افضل خان نے شیواجی کو پکڑنے کا ذمہ لیا
افضل خان کی شیواجی کے خاندان سے پہلے ہی دشمنی تھی۔ دراصل شروع میں شیواجی کے والد شاہ جی راجے بھوسلے اور افضل خان بیجاپور سلطنت کے لیے کام کرتے تھے۔
بعد میں دونوں کے درمیان جھگڑا ہو گیا اور افضل خان نے شیواجی کے والد شاہ جی کو سنہ 1648 میں غداری کے الزام میں زنجیروں میں جکڑ کر بیجاپور بلوایا۔
شیواجی اور ان کی ماں جیجا بائی کا خیال تھا کہ سنہ 1654 میں شیواجی کے بڑے بھائی سنبھاجی کے قتل میں افضل خان کا ہاتھ تھا۔
شیواجی کے ذہن میں افضل خان کی شبیہ ایک ایسے شخص کی تھی جس نے ان کے والد کے ساتھ برا سلوک کیا تھا اور وہ ان بھائی کے قتل میں بھی ملوث تھا۔
Getty Imagesدوستی کا ڈرامہ
جب بیجاپور میں شیواجی کی سرگرمیاں بڑھ گئیں تو بڑی بیگم صاحبہ نے اپنے درباریوں سے پوچھا کہ کیا وہاں کوئی ایسا شخص ہے جو شیواجی کو کچلنے کی صلاحیت رکھتا ہو؟ افضل خان پہلا شخص تھا جس نے اس کام کو کرنے کی رضامندی ظاہر کی۔
ڈینس کنکیڈ اپنی کتاب ’شیواجی دی گرینڈ ریبل‘ میں لکھتے ہیں کہ ’کھلی عدالت میں افضل خان نے اعلان کیا کہ وہ شیواجی کو قیدی بنا کر لائیں گے اور وہ بھی گھوڑے سے اترے بغیر وہ انھیں چوہے کی طرح پنجرے میں بند کر دیں گے۔۔۔ تاکہ یہاں کے لوگ ان کا مذاق اڑا سکیں۔‘
کتاب کے مطابق ’ذاتی طور پر وہ شیواجی کو پکڑنے کے بارے میں اتنے پراعتماد نہیں تھے۔ جب انھوں نے بڑی بیگم صاحبہ سے مشورہ کیا تو انھوں نے یہ مشورہ دیا کہ وہ شیواجی کو اس سے دوستی کا بہانہ بنا کر پکڑنے کی کوشش کریں۔ ‘
افضل خان کا ظلم
افضل خان نے اپریل 1659 میں شیواجی کو پکڑنے کی مہم شروع کی۔ وہ دس ہزار سپاہیوں کو اپنے ساتھ لے گئے۔ سب سے پہلے وہ وائی کی طرف بڑھے، جہاں انھوں نے کچھ عرصہ حکومت کی۔
راستے میں انھوں نے پنڈھار پور کے کئی مندروں کو نقصان پہنچایا۔ وہاں کے تاجروں، پجاریوں اور کسانوں سے ان کی فوج کے اخراجات اٹھانے کو کہا گیا، جو تقریباً ڈھائی لاکھ روپے ماہانہ تھے۔
جادوناتھ سرکار لکھتے ہیں کہ ’افضل خان نے پلٹن کے دیش مکھ بجاجی نائک نمبالکر کو دھمکی دی کہ اگر انھوں نے انھیں دو لاکھ روپے کا تاوان نہ دیا تو وہ انھیں ہاتھی سے کچل دیں گے‘۔
نمبالکر نے دو لاکھ روپے دے کر اپنی جان بچائی۔ شیواجی کو معلوم تھا کہ افضل خان کی ان اشتعال انگیز حرکتوں کا مقصد اسے اپنے قلعے سے باہر نکال کر کھلے میں بلانا ہے۔ لیکن وہ افضل خان کے جال میں نہیں پھنسے۔
افضل خان نے لوہے کا پنجرہ بنایا
ابتدا میں افضل خان شمال میں پُونا جا کر شیواجی کے گڑھ پر حملہ کرنا چاہتے تھے لیکن جیسے ہی انھیں اس کی خبر ملی شیواجی پُونا سے دور چلے گئے کیونکہ وہ جگہ جنگ کے لیے موزوں نہیں تھی۔
انھوں نے جاولی ضلع کو اپنا مرکز بنایا۔ اسی دوران افضل خان نے لوہے کا پنجرہ بنانا شروع کر دیا، جس میں وہ شیواجی کو قید کرکے بیجاپور لے جانے والے تھے۔
یہاں سے دونوں حریفوں کے درمیان چست سفارت کاری کا دور شروع ہوا۔
ویبھو پورندرے شیواجی کی سوانح عمری ’شیواجی انڈیا کے عظیم جنگجو بادشاہ‘ میں لکھتے ہیں کہ ’شروع میں شیواجی کو دھمکانے اور ڈرانے کے بعد افضل خان نے اچانک ان پر مہربانی کرنا شروع کر دی۔ شیواجی نے یہ تاثر بھی دیا کہ گویا وہ طاقتور افضل خان کا سامنا کرنے سے ڈرتے ہیں۔‘
افضل خان اور شیواجی کے درمیان خطوط کا تبادلہ
کچھ دنوں کے بعد افضل خان نے اپنے ایک قاصد، کرشنا جی بھاسکر کلکرنی کے ذریعے شیواجی کو پیغام بھیجا۔
انھوں نے لکھا کہ ’تمھارے والد میرے بہت اچھے دوست رہے ہیں، اس لیے تم میرے لیے اجنبی نہیں ہو، میں بادشاہ عادل شاہ سے کہوں گا کہ وہ جنوبی کونکن میں زمین اور جاگیر پر تمھاری ملکیت برقرار رکھے۔ میں قلعے بھی حوالے کردوں گا۔ میں آپ کو پہچان دوں گا، اگر آپ بادشاہ سے ملنا چاہتے ہیں تو میں اس کا انتظام بھی کروں گا، اگر آپ وہاں نہیں جانا چاہتے تو آپ کو وہاں اپنی موجودگی درج کرانے سے بھی استثنیٰ دیا جا سکتا ہے۔‘
شیواجی نے افضل کے قاصد کا احترام کیا۔ رات کو وہ ان کے ڈیرے پر گئے اور ان سے چپکے سے ملے اور ان سے پوچھا کہ افضل خان کا اصل ارادہ کیا ہے؟
وہ کلکرنی سے یہ جاننے میں کامیاب ہو گئے کہ افضل ان کے خلاف ایک گہری سازش رچ رہا ہے۔ شیواجی نے اس خط کا جواب افضل خان کے قاصد کے ذریعے نہیں بھیجا بلکہ اپنے قاصد پنتا جی گوپی ناتھ کے ذریعے بھیجا تھا۔
انھوں نے لکھا کہ ’آپ نے کرناٹک کے تمام بادشاہوں پر فتح حاصل کر لی ہے۔ آپ نے مجھ پر جو احسان کیا ہے وہ بہت بڑی چیز ہے۔ آپ اس دنیا کے انمول ہیرے ہیں، جس میں دھوکہ دہی کا ذرہ برابر بھی عنصر نہیں ہے۔‘
’اگر آپ اس جنگل کی رونق دیکھنا چاہتے ہیں تو جاولی آئیں اور اسے اپنی آنکھوں سے دیکھیں۔ اس سے میرے ذہن میں آپ کے بارے میں تمام شکوک و شبہات دور ہوں گے اور میری عزت میں بھی اضافہ ہوگا۔ اگر آپ یہاں آئیں گے تو میں اپنے ہاتھوں سے آپ کو تلوار پیش کروں گا۔‘
شیواجی اور افضل خان کی ملاقات طے تھی
شیواجی کے اس سفارتی خط کا ایسا اثر ہوا کہ افضل خان نہ صرف جاولی جانے پر آمادہ ہوئے بلکہ وہ پرتاپ گڑھ قلعے کے نیچے ایک پہاڑی پر شیواجی سے ملنے پر بھی راضی ہوئے۔
شیواجی کے افضل خان کے نام خط کا آخری جملہ یہ تھا کہ ’یہ دعوت صرف آپ کے لیے نہیں، آپ کی فوج کے لیے بھی ہے۔‘ یہ جملہ افضل خان کے لیے بہت وزن رکھتا تھا۔
جادوناتھ سرکار لکھتے ہیں کہ ’شیواجی نے اپنے لوگوں کو ہدایت کی کہ وہ افضل خان کے سپاہیوں کو بغیر کسی رکاوٹ کے اپنے علاقے میں داخل ہونے دیں۔ یہ طے پایا کہ افضل خان دس نومبر 1659 کی دوپہر کو شیواجی سے ملاقات کریں گے۔
وہ پالکی پر ہتھیاروں کے ساتھ پرتاپ گڑھ قلعہ جائیں گے۔ وہ قلعے کے نیچے رکھے ہوئے خیمے میں اترے۔ ۔وہ اپنے ساتھ دو یا تین سپاہی لے جا سکتے تھے۔
شیواجی کو بھی اپنے ہتھیار اور اتنی ہی تعداد میں سپاہی لانے کی اجازت تھی۔ یہ اتفاق تھا کہ جیسے ہی افضل خان وہاں پہنچے، شیواجی قلعہ سے اتر کر تحائف لے کر افضل خان کے استقبال کے لیے آئے۔
Getty Imagesشیواجی نے اپنے سپاہیوں کو جنگل میں چھپا دیا
افضل خان سے ملاقات سے ایک دن پہلے شیواجی نے اپنے فوجی جرنیلوں کو بلایا اور ان سے کہا کہ وہ خاموشی سے اپنے سپاہیوں کو جنگل میں تعینات کریں اور انھیں چوکس رہنے کی ہدایت کی۔
شیواجی کو اپنے جاسوسوں سے معلوم ہوا کہ افضل خان کے گروہ میں بہت سے سنار ہیں، جو راستے میں کاروبار کرنے کے لیے اپنا سامان لے کر آئے تھے۔
شیواجی نے افضل خان سے ان سناروں کو پرتاپ گڑھ بھیجنے کی درخواست کی تاکہ وہ ان کے زیورات خرید کر بیجاپور کی سلطنت کو بطور تحفہ دے سکیں۔
افضل نے ان سناروں کو فوراً شیواجی کے پاس بھیجا اور یہ دکھانے کے لیے کہ ان کے ارادے صاف تھے، شیواجی نے ان سے نہ صرف بہت سے زیورات خریدے بلکہ انھیں قلعہ میں اپنا مہمان بھی بنایا۔ میٹنگ سے پہلے شیواجی نے اپنے سینیئر ساتھیوں کی میٹنگ بلائی۔
جادوناتھ سرکار لکھتے ہیں کہ انھوں نے انھیں ہدایات دیں کہ اگر وہ اس میٹنگ سے زندہ واپس نہیں آئے تو ریاست کا نظم و نسق کیسے چلایا جائے گا۔ اگر افضل خان اپنی بات سے مکر گیا تو وہ توپ کا گولہ چلانے کا حکم دے گا‘۔ یہ سن کر شیواجی کے سپاہی افضل خان کے سپاہیوں پر حملہ کریں گے۔
افضل خان اپنے تین سپاہیوں کے ساتھ شیواجی سے ملنے آئے۔
دس نومبر 1659 کی صبح پرتاپ گڑھ قلعے کے صحن میں ایک خیمہ لگایا گیا۔
اس کی چھت بہت اچھی طرح سے سجی ہوئی تھی اور فرش پر مہنگے قالین بچھے ہوئے تھے۔
Getty Imagesشیواجی اور افضل اپنے ساتھ تین تین ساتھیوں کو لے آئے
ویبھو پورندرے لکھتے ہیں کہ ’شیواجی نے سورج دیوتا کو سجدہ کیا اور بھوانی دیوی کی پوجا کی اور اس ملاقات کے لیے خود کو تیار کیا۔ دوپہر کے کھانے کے بعد انھوں نے سفید لباس پہنا۔ اس کے نیچے انھوں نے لوہے کا کراس بکتر پہنا۔ اپنے سر کی حفاظت کے لیے انھوں نے نیچے لوہے کی ٹوپی اور کڑھائی والی پگڑی پہنی۔ انھوں نے اپنی دائیں بازو میں ’نیٹل‘ نامی ہتھیار اٹھا رکھا تھا۔ انھوں نے اپنے بائیں ہاتھ میں شیر کے پنجے کی شکل کا ایک لوہے کا ہتھیار پکڑا ہوا تھا۔‘
ان کے ساتھ ان کے دو قابل اعتماد ساتھی جیوا مہالا اور سمبھاجی کاؤجی بھی تھے۔ جیوا تلوار بازی میں ماہر تھے۔ ان دونوں کے پاس پٹہ (غیر منحنی تلوار) اور فرنگ (غیر ملک کی بنی ہوئی تلوار اور ڈھال) تھی۔‘
شیواجی کے درباری کرشنا جی اننت سبھاساد مراٹھی میں لکھی گئی شیواجی کی سوانح عمری ’سبھاساد بکھر‘ میں لکھتے ہیں کہ ’جب افضل شیواجی سے ملنے نکلے تو ان کے ساتھ تقریباً ایک ہزار سپاہی تھے۔ شیواجی کا قاصد پنتاجی گوپی ناتھ افضل خان کے پاس گیا اور کہا کہ اتنے فوجیوں کو لے کر جانا۔ ہمارے ساتھ پہلے سے طے شدہ شرائط کی خلاف ورزی ہوگی۔‘
بہت سارے سپاہیوں کو دیکھ کر شیواجی واپس قلعہ میں چلے جائیں گے اور ممکن ہے کہ یہ ملاقات نہ ہو، یہ سن کر افضل نے اپنے سپاہیوں کو روک دیا، وہ اپنے ساتھ صرف دس قابل بھروسہ سپاہیوں کو لے گئے، جنھیں انھوں نے قلعہ سے کچھ فاصلے پر رکھا۔ اور انھوں نے اپنے تین ساتھیوں کو اپنے ساتھ آنے کا کہا۔
افضل خان نے شیواجی کی گردن کو اپنی گرفت میں لے لیا
جب شیواجی کو یہ خبر پہنچی کہ افضل خان شامیان پہنچ گئے ہیں تو شیواجی نے قلعہ سے نیچے اترنا شروع کر دیا۔
شیواجی جب خیمے میں داخل ہوئے تو افضل خان وہاں بنے ہوئے چبوترے پر کھڑے تھے۔
ڈینس کنکیڈ لکھتے ہیں کہ ’افضل خان نے جیسے ہی شیواجی کو دیکھا، وہ چیخنے لگا کہ ایک عام زمیندار کا بیٹا شہزادوں کی طرح اپنا خیمہ کیسے سجا سکتا ہے؟ شیواجی نے جواب دیا کہ یہ گدے اور قالین ان کے اپنے آرام کے لیے نہیں ہیں، بلکہ ان کی آؤ بھگت کے لیے بچھائے گئے ہیں۔
بیجاپور کی شاہی ریاست کے نمائندے کا استقبال کرنے کے لیے جسے ان کے ساتھ بیجاپور کے محل میں بھیجا جائے گا۔ افضل خان کو یہ بات پسند آئی اور انھوں نے مسکرا کر اپنے بازو پھیلا کر شیواجی کو گلے لگا لیا۔
شیواجی قد میں افضل خان سے بہت چھوٹے تھے اور صرف ان کندھوں تک آتے تھے۔
جب وہ دونوں گلے مل رہے تھے تو شیواجی کو بے چینی محسوس ہوئی۔ ایک سیکنڈ سے بھی کم وقت میں افضل خان نے اپنے بائیں ہاتھ سے شیواجی کی گردن کو اپنے بازوؤں میں جکڑ لیا۔
یہ ایک پہلوان کی گرفت تھی۔ پھر اس نے شیواجی پر اپنے دائیں ہاتھ سے خنجر سے حملہ کیا۔
چونکہ انھوں نے اپنے کپڑوں کے نیچے بکتر پہن رکھی تھی اس لیے اس پر اس کا کوئی اثر نہیں ہوا۔
ڈینس کنکیڈ مزید لکھتے ہیں کہ ’شیواجی نے افضل خان کی گرفت سے بچنے کی کوشش کی لیکن انھوں نے شیواجی کی گردن پر اپنی گرفت مضبوط کر لی۔ پھر شیواجی نے سانپ کی طرح گھومتے ہوئے، پہلے اپنا بازو چھڑایا اور اپنی بائیں ہتھیلی میں چھپے ہوئے واگھ کو زور سے افضل خان کی پیٹھ میں گھونپ دیا۔ افضل خان درد سے چیخے اور پھر کہا ’غداری! غداری! اس نے مجھ پر حملہ کیا اسے فوراً مار ڈالو۔‘
افضل خان اور اس کے ساتھیوں کی موت
یہ سن کر کچھ فاصلے پر کھڑے افضل خان اور شیواجی کے سپاہی ان کی طرف دوڑے۔ سید بندہ نے اپنی تلوار سے شیواجی کے سر پر حملہ کیا۔ لیکن ان کی پگڑی کے اندر موجود لوہے کی ٹوپی نے انھیں بچا لیا۔
پھر جیوا محلہ نے اپنی تلوار سے سید کے دائیں ہاتھ پر حملہ کر کے اسے توڑ دیا۔
ویبھو پورندرے لکھتے ہیں کہ ’ان کے محافظ زخمی افضل خان کو خیمے سے نکال کر پالکی پر بٹھانے میں کامیاب ہو گئے۔ شیواجی کے آدمیوں نے ان کا پیچھا کیا۔ شمبھوجی کاؤجی نے سب سے پہلے پالکی کو لے جانے والوں کی ٹانگوں پر حملہ کیا۔‘
پالکی کے گرنے کے بعد انھوں نے افضل خان کا سر قلم کر دیا۔ وہ اسے شیواجی کے پاس لے گئے۔ ایک ایک کر کے مراٹھا سپاہیوں نے افضل کے بھتیجوں رحیم خان، عبدالسعید اور اس کے مراٹھا ہندو ساتھیوں پیلاجی، شنکراجی موہتے اور کلکرنی کو قتل کر دیا۔ ایک حبشی مسلمان ابراہیم سید۔ شیواجی کے ساتھیوں میں بھی شامل تھا۔‘
شیواجی کے سپاہیوں نے حملہ کیا
تھوڑی ہی دیر میں قلعہ سے بگل بج گیا۔ یہ سن کر جنگل میں چھپے شیواجی کے سپاہی باہر نکلے اور افضل خان کے سپاہیوں پر چاروں طرف سے حملہ کر دیا۔
افضل خان کے سپاہیوں پر یہ حملہ اچانک تھا جس کی انھیں بالکل توقع نہیں تھی۔
کچھ سپاہی فوراً میدان چھوڑ کر چلے گئے لیکن کچھ سپاہی شیواجی کے سپاہیوں سے لڑے لیکن وہ چاروں طرف سے گھرے ہوئے تھے اور ایسی جگہ لڑ رہے تھے جہاں انھیں لڑائی کا کوئی تجربہ نہیں تھا۔
کچھ دنوں بعد راجا پور فیکٹری پہنچنے والی برطانوی رپورٹ میں بتایا گیا کہ اس جنگ میں تقریباً 3000 فوجی مارے گئے۔
Getty Images
جادوناتھ سرکار لکھتے ہیں کہ اس جنگ کے بعد شیواجی کے سپاہیوں کو بہت پیسہ ملا۔ انھوں نے افضل خان کے سپاہیوں سے 4000 گھوڑے، 1200 اونٹ، 65 ہاتھی اور دس لاکھ روپے نقد چھین لیے۔ اعلان کیا گیا کہ جو لوگ ہتھیار ڈالنا چاہتے ہیں۔ وہ اپنے دانتوں میں گھاس کا ایک ٹکڑا پکڑ لیں، جن لوگوں نے ایسا کیا ان کی جان بچ گئی۔
جنگ میں مرنے والے شیواجی کے سپاہیوں کی بیواؤں کو پنشن دینے کا اعلان کیا گیا۔
جب افضل خان کی شکست کی خبر بیجاپور پہنچی تو پوری ریاست میں سوگ چھا گیا۔ بڑی بیگم صاحبہ نے خود کو ایک کمرے میں بند کر لیا اور کھانا پینا چھوڑ دیا۔